Студент йыллары – аьр бир аьдемнинъ яшавында энъ де мутылмас шак. Аьдемнинъ эсинде сол заман дайымга калады – наьсипли куьнлер, окув дерислери, дослык эм суьйим. Бизим район мектеблерин битирген балалар элимиздинъ туьрли муьйислеринде окыйдылар деп эситемен. Сол зат баьримизге де суьйинишли. Зарина Кожаева эм Камиля Эрежепова тенълес болып оьстилер Уьйсалган авылында, мектебте де бирге окып, ийги билим алып, медициналык колледжге туьстилер.
Зарина Пятигорск каласында медициналык колледжинде «фармация» кесписи бойынша окыйды. Ийги окыйтаган кызалак тек колледжининъ тувыл, каладынъ ямагат яшавында белсен катнасады. Зарина туьрли конкурсларда, спорт ярысларда катнасып, разылык хатларга тийисли болады. Соьйтип, ога Лермонтов каласынынъ билимлендируьв боьлигининъ етекшиси Е.Кобзевадынъ эм «Яслар орталыгы» МКУ директорынынъ куллыгын юритуьвшиси Ю.Важничия атыннан ямагат шараларды уйгынлав эм озгарув ислеринде белсен катнасканы уьшин разылык хат тапшырылган. Зарина тенълери мен бирге «Кавказ уьшин согыс» тарих реконструкциясынынъ фестивалинде, «Несиллер эси» акциясында ортакшылык эткен. Солай ок студент кыз тав ювырув бойынша XI аьдеттеги окув ошаклар арасында озгарылатаган ярысларда Пятигорск медициналык колледжининъ куьбининъ сырасында биринши орынды алган. Окытувшылары окымыслы кызды коьтергишлейдилер.
Камиля Ессентуки каласында регионлар ара коьп кеспили технологиялык колледжде «сестринское дело» кесписи бойынша окыйды. Кызалак оьзининъ мырадына уьстинликли барады – ийги этип окыйды, колледжде болатаган шараларда катнасады. Озган айдынъ ишинде колледж директоры Н.Жукова Камиляга окувында етискен уьстинликлери эм ямагат яшавда белсен катнасатаганы уьшин Сый грамотасын тапшырды.
Бегали эм Саниет Эрежеповлар кызы ман куьезленедилер. Янъыларда олардынъ атына Разылык хат келди. Онда булай язылган: «Сыйлы ата-аналар! Регионлар ара коьп кеспили технологиялык колледжининъ администрациясы эм окытувшылык коллективи сизди кызынъыз Камиля Эрежеповады ийги этип тербиялаганынъыз уьшин разылык билдиремиз. Камиля оьзин яваплы эм билимли студентка этип коьрсеткен, ол билим алмага ымтылады, солай ок колледж яшавында белсен катнасады. Колледж директоры Н.Жукова».
Медицина тармагында ислейтаган инсанлар яваплы болмага керек, неге десе олардынъ колында аьдемнинъ яшавы. Зарина эм Камиля кыйынлы, ама сыйлы кеспи сайлаганлар. Мен ойлайман, сол кеспиди олар юреги мен сайлаган. Келеекте кызларымыз оьз кесписинде ийги куллыкшылар болар деп шекленмеймиз. Сол затка олардынъ буьгуьнлерде уьстинликли окувы шайыт болып туры. Заринага эм Камиляга окувында аьли де бийикликлер, келеекте исинде уьстинликлер эм яшавда наьсип, ден савлык йорайман.
Г.Бекмуратова.
Суьвретлерде: З.Кожаева; К.Эрежепова.
