Шарады Ногай район билимлендируьв боьлигининъ етекшиси Кайтархан Отегенова ашып, «2018-2019-ншы окув йылларында Оькимет сынавлардынъ оьтуьвининъ баскалыгы» деген докладын окыды. Ол келеяткан Оькимет сынавлары акында айтып, окувшыларды «Россия Федерациясында билимлендируьв акында» Федераллык законы ман таныстырды. Оннан сонъ соьз «Ногайский район» МР администрациясынынъ аькимбасынынъ орынбасары Б. Ярлыкаповка берилди. 

     – Буьгуьнги йыйын бек маьнели эм пайдалы. Билимлендируьв боьлиги сизди тийисли талаплавлар ман таныстырады. Янъыларда А.Джанибеков атындагы мектебининъ 11-нши класс окувшылары ман Дагестан Аькимбасында аьрекет эткен Ясуьйкенлер советининъ председатели йолыгысты. Сонда ол окувшыларга «Ким окытувшы болмага суьеди?» деген соравды берди, ама окытувшы болмага аваслыгы болганлар табылмады. Сол зат кыйналдырмай болмайды. Сога коьре, биз окытувшыдынъ абырайын коьтеруьв мен байланыслы исти тийисли дережеде юритпеймиз, деген ой келеди. Экиншилей, сынавлар оьтер уьшин «Информатика» сабагын сайлаганлардынъ саны бек аз, аьлиги дуныяда компьютер мен аьруьв ислеп билген аьдемге куллык табув тыныш болар экенин де биз ийги анълатпайтаган болармыз. Аявлы окувшылар, сизге Оькимет сынавларды уьстинликли оьтуьвди йорайман, тек оьз куьшинъизге, билиминъизге сенинъиз, – деди Баймагомед Аминович оьз соьзинде.

     Тагы да буьгуьнги йыйында Нариман авыл орта мектебининъ етекшиси Джамалутдин Эсиргепов «Оькимет сынавларга аьзирленуьвде аьелдинъ эм ортак билимлендируьв учреждениединъ биргелес аьрекет этуьви» , А.Джанибеков атындагы мектебининъ математика дерисининъ окытувшысы Кадрия Маликова «ЕГЭ-ге аьзирленуьвде математика окытувшысынынъ куллыгынынъ йорыгы», Куьнбатар авыл мектебининъ психологы Юмазиет Ганиева «ЕГЭ-ге аьзирленуьвде ата-анадынъ орыны эм олардынъ ярдамы» темаларга оьз докладларын окып, йыйылганларга  эситтирдилер. Олар аьр бириси окувшыларга ЕГЭ-ге аьзирленмеге енъиллик эткен маслагатлар бердилер. 

Н.Кожаева.