Янъыларда сол тармактынъ пресс-службасынынъ билдируьви мен йогарыда белгиленген тема бойынша оьткен юма ишинде йыйын болып озган. Сонда баьри территориаллык налоговый инспекцияларынынъ ваькиллери ортакшылык эткенлер.

Шарады аша келип, Дагестан Республикасынынъ налоговый службасынынъ федераллык управлениесининъ етекшисининъ орынбасары Гаджи Шамхалов налог тоьлевшилер мен ис аьрекеттинъ йорыкларын белгилеген.

«Налог тоьлевшилерди канагатлавда айырым формула ман ислевге коьшпеге керек – «Тез.Енъил.Баьрине де онъайлы.Кеспи усталык пан», – деди Г.Шамхалов. – «Соны ман байланыслы бизим бас борышымыз – налог тоьлевшилер оьзлерине тийисли йорыкларды тутувдынъ дережесин оьстируьв болады».  Солай ок, ол ис йолдасларына республика яшавшыларына Интернет аркалы билимлер мен боьлисип турмага маслагатын да берди.  

«Биз ерли бюджетлерди толтырамыз, сонынъ уьшин олар бизим алал досларымыз болмага кереклер, олар бизге тийисли билдируьвлерди халкка еткермеге уьйкен коьмеклерин этпеге кереклер», – деген ойын да Г.Шамхалов билдирди эм кала, район администрацияларын да бу куллыклар ман аьвликтирмеге буйырды.