Мундагы онынъ суьйикли окытувшылары эндиги ис йолдаслары болганлар. Олар да Зухра Алавдиновнадынъ буьгуьнги уьстинликлери мен оьктемсийтаганларын эситемен. Солай ок Нариман авыл орта мектебинде окытканлардынъ да, окыганлардынъ да ийги аты районымызга белгили.
Зухра Нурлубаевады дуныяда сыйлы деген исти сайлавга орыс тили эм адабиатынынъ сабагына эм балаларга суьйими аькелген, сол суьйим болса ога анасыннан коьшкен болар. Ашувхан Джамалова да коьп йыллар узагына окытувшы исин алаллык пан бардырган, «ДР Халк билимлендируьвининъ алдышысы» деген атты да казанган. Эки несилдинъ окытувшылары акында да «Мектебтинъ эм балалардынъ яшавы ман яшайдылар», – деп айтпага болады.
З.Нурлубаева туьрли конкурсларда катнасып та уьлгиреди. Ол «Йыл окытувшысы-2016» конкурсынынъ район кезегинде катнаскан. Солай ок ол етекшилеген Нариман авыл мектебининъ куьби Л.Толстойдынъ Кавказга келгенли 160 йыллыгына багысланган тарих-адабиат конкурсында ортакшылык эткен.
Зухра Алавдиновна Савлайроссиялык «Олимпус Весенняя сессия» йогары программалы сабак олимпиадасын уйгынлаганы уьшин (заочный конкурс), Савлайроссиялык «Яслар филологиялык чемпионатына» савгашыды аьзирлегени уьшин дипломлар ман савгаланган. «Профсоюзда белсенли иси уьшин», «Ийги иси эм яс несилди тербиялавда коскан уьлиси уьшин» эм баска Сый грамоталар ман савгаланган.
Онынъ окувшылары да туьрли конкурсларда катнасканлар эм окытувшысынынъ уьйкен куьезине баргылы орынларды бийлегенлер, айтпага, Савлайроссиялык сочинениелер конкурсынынъ республикалык кезегинде Аскер Кувандыков 2-нши орынга тийисли болган, «Савлайроссиялык орыс тили бойынша яслар чемпионатында» Медина Кувандыкова медаль мен белгиленген, ол энъ де ийги деп саналган 10 катнасувшы сырасына кирген.
«Шатраш эм шашкалар» турнирлеринде Зухра Нурлубаева оьзи де, окувшылары да йыл сайын баргылы орынларды бийлейди десек, оьтирик болмас. Окытувшылары болса республикалык кезегине де еткен.
Зухра Алавдиновна оьзининъ выпускниклери акында уьйкен куьези мен айтады. Ол, боьтен де Н.Пирогов атындагы медициналык университетинде окып, аьли Москвада А.Бакулев атындагы юрек-сосуд хирургиясынынъ илми орталыгында куллык эткен Зульфия Тенгизова ман Ислам Асановты, Санкт-Петербург каласындагы Михайловская академиясында окыган Аскер Янибековты, Норильск каласында мектеблердинъ уьстинде бас бухгалтер болып ислеген Патимат Мурзаевады белгилейди.
Зухра Алавдиновнадынъ ийги исин ОГЭ эм ЕГЭ-лерде окувшыларынынъ ийги сырагылары шайытлайды. Олардынъ сынавларда алган баллары йогары болады. Энъ де ийги билимлерин 2016-ншы йылда Айгуль Муллаева коьрсеткен, ол Орыс тили бойынша ЕГЭ-де 95 балл алган.
Ислеген 20 йыл ишинде Зухра Алавдиновна 3 выпуск балаларын яшав йолына салган. Зухра Нурлубаева тек билим беруьв исин йогары дережеде толтырып калмайды. Ол – ийги ана, коьримли тандыр саклавшы, ян косак эм алал кыймас. Баьтир Нурлубаев пен бирге ол мектебте ислеп баслаган йыл аьел курган, экевлери уьш бала тербиялайдылар. Эдуард пан Карина элимиздинъ сырт калаларында окув ошакларында билим аладылар, ийги окувлары ман ата-анасын суьйиндиредилер. Кишкей кызы Сабрина – окувшы.
«Уяда не коьрсе, ушканда соны этер» деген соьз бар ногайда. Уьйинде ийги коьрим алган балалар, анасынынъ оьз исине бек яваплы болувын сезип, келеекте оьзлери де ислерин яваплык пан толтырар деп ойлайман.
Н.Кожаева.
Суьвретте: З.Нурлубаева оьз окувшылары ман.
