Сизди ислам динимиздинъ энъ сыйлы байрамларынынъ бириси Курман-байрамы ман кутлайман. Сизге эм сизинъ аьеллеринъизге яхшылык, оьрленуьв, тынышлык болсын! Сизге бу ийги куьнде ян тазалыкты, Кудайымыз алдында бас ийуьвинъизди йорайман. Сизинъ уьйлеринъизде Уллы Оьрдегимизге ынанымлыктынъ эм бас ийуьвдинъ шынты нуры яшасын. Сизинъ ислеринъиз сизди куьналерге йолыктырмасын, олар сизинъ оьлимсиз янларынъызга тек пайда аькелсинлер. Сизге Алла-Тааладынъ ийгилигин эм онынъ кеширимин тилеймен. Юреклеринъиз ашык болсын, Уллы Оьрдегимиз сизди баьри яманлыктан да Оьзи коршаласын. Тоьгеректеги баьри зат та кесек заманга экенин эсинъизде тутынъыз эм бу дуныяда тек яхшы ислер этпеге алгасанъыз.
Бу куьнлерде мусылманлар Уллы Кудайымыздынъ буйрыгын толтырмага аьзир болган – Онынъ уьшин оьзининъ кедеси Исмаилди курман этпеге онъланган Ибрагим-пайхамбардынъ (Алла ога тынышлык берсин) акында эскередилер. Соьйтип, ол кедесин курман этеек болып турган аьсерде, Алла-Таала онынъ пышагын оьтпегендей эткен эм алдына курманлыкка деп койды салган. Бу ис Ибрагим-пайхамбар (Алла ога тынышлык берсин) уьшин уллы сынав болган эм ол соны намыслы кепте оьткен. Бизге сол себептен пайхамбарлар – аьдемлер арасында энъ де ийгилери деп айтылган, олар бизге баьри яктан да коьрим эм уьлги боладылар, алды ман – Яратувшымыздынъ буйрыкларын толтырув яктан.
Алла-Таала уьшин Курман-байрам куьнлеринде айванды курманлыкка сойганнан ийги зат йок. Кудайымыз курманлыкка шыгарылган айванды онынъ канынынъ биринши тамшысы ерге тийгенше кабыл этеди. Сонынъ уьшин суьйининъиз эм айванды курманлыкка таза юрегинъизден шалынъыз.
Бизим кожайынымыз Зайд ибн Аркам (Алла-Таала ога разы болсын), онынъ йолдаслары бир кере пайхамбардан (ога тынышлык эм разылык болсын) булай деп сораганлар деп хабарлайтаган эди: «О Алладынъ элшиси, узхия (курманлык этуьв) не зат экен?». Ол булай деп яваплаган: «Ол сизинъ атанъыз Ибрагимнинъ (ога тынышлык болсын) суьннеси». Олар солай ок тагы да сораганлар: «Сондай ис уьшин биз кайдай савга алар экенмиз?». Ол: «Сиз курманлыкка шалган малдынъ аьр бир туьги уьшин савга аларсыз», – деп явап кайтарган.
Курман-байрам мусылманлар уьшин – ол Кудайымызга бойсынувымызды коьрсетуьв, Уллы Оьрдегимизге бизге йиберген ийгиликлери уьшин разылык билдируьвимиз, динимиз бойынша кардашларымыз бан бирге уьйкен ян шатлыгымызды эм бирлигимизди сезетаган заман. Курман-байрамнынъ айырым баскалыкларынынъ бириси – сол куьн эм оннан сонъгы Ат-Ташрик
куьнлери ишинде мусылманлар курманлыкка мал шалатаган, этин кардашларына, ювыкларына, солай ок олар ят аьдемлер болса да керексинетаганларга, ярлыларга, пайлайтаган заман. Сол куьнлерде мусылманлар оьликлерге барадылар, Сыйлы Куран китабин окыйдылар, соны окыган уьшин тиетаган савапты бизим дуныядан кеткенлерге йибередилер. Соны ман бу уллы байрам саваплыкты эм бирлесуьвди, ювык аьдемлер акында кайгы шегуьвди эм керексинетаганларга языксынувымызды билдиреди. Сизге Уллы Алла-Тааладынъ рахатлыгы эм савабы язылсын! Сизди сыйлап
Мухаммад Расул-аьжи Атангулов, Ногай районынынъ имамлар советининъ председатели.