Быйыл савлай элимиз Адабиат йылын белгилейди. Бу йылдынъ ишинде этилинген коьплеген шаралар адабиат, ана тилине багысланган. Соьйтип, янъыларда Терекли-Мектеб авылында орынласкан орталык китапхана меканында ногай адабиатынынъ маьселелерине багысланган тоьгерек стол озгарылды. Шарада ногай язувшылары эм шаирлери Мурат Авезов, Магомед-Али Ханов, Салимет Майлыбаева, Тахир Акманбетов, Айнара Нургишиева, Венера Кидирниязова, Гульфира Бекмуратова, "Ногай Эл" ФНКА Йогары миллет советининъ председателининъ орынбасары Султан Магрупович Джумаев, "Шоьл тавысы" республикалык газетасынынъ бас редакторы Эльмира Кожаева, район авыл китапханаларынынъ етекшилери ортакшылык эттилер.