Атайларымыздан коьп ийги соьзлер бизге асабалыкка калганлар. Аьр бириси кенъ маьнели, акыллы. Аьр кайсысына да яшавда келисли орын табылады эм келеекте де табылаягына шек йок. Аьли меним айтаягыма «Аьвлетлеринънинъ етимислерине оьзинъдикиннен де куьшли суьйинесинъ» деген соьз бек келисли болса ярайды,- деп ойлайман.
Буьгуьнлерде аясында аявлап оьстиретаган Мадинадынъ етимислерине атасы Эмир мен анасы Айгуль Картакаевлер бек куванадылар. Мадина мага да бек аьруьв таныс, ол бизим коьз алдымызды оьсип келген кызалак. Оьзининъ куванышлы юзи мен, тири коьзлери мен, йылы куьлемсиреви мен оьзине йылы карататаган кызалак. Мадинадынъ орамда сени коьрип, ювырып келип амашлык сорайтаганы ша, аьдемди суьйиндиреди, неге десе аьлиги заманларда бизим коьбиси балаларымыз сол амашлык сорав ийги аьдетимизди де мутып барадылар.
Талаплы кызымыз Мадина кишкейиннен йыр ман аьвлигип келеди. Ол оьз оьнерин балалар бавдынъ тербиялавшысы болган шаклардан алып коьрсетип келеди. Балалар бавында, школа яшавында болатаган аьр бир шарада катнасады десек оьтирик тувыл.
Мадинадынъ буьгуьнлердеги етимиси бизди боьтен де суьйиндирди. Онынъ занъыраган билбил сесин тек бизим еримизде тувыл, Россиядынъ бас каласында да эситтилер. Ол ийгилердинъ сыраларында болып, «Тавыс. Балалар» телепроектинде катнасты.
Мадинадынъ анасы Айгульдинъ айтувына коьре, олар яз шакларда «Тавыс.Балалар» деген шарадынъ болаягын билип, сонда катнаспага ойландылар. Тек сонда болаяк кастингке шакырув алармыз деп ойламадылар, ама сеним бар эди. Сеним акланды, Мадина 2000 балалар ишиннен сонда ортакшылык этпеге сайланды. Мырад толды, Мадина кырк кийик айдынъ ишинде Останкино телевизионлык орталыгыннынъ сценасында баслап английс, сонъ ана тилимизде йырлар йырлады. Мунда ол савгалы орынга тийисли болмаса да, сайлавды оьтпесе де, оьзине уьйкен йолды ашты.
Онынъ буьгуьнлерде окытувшысы Дагестан Республикасынынъ композиторлар Союзынынъ председатели Рамазан Фаталиев Мадинадынъ акында булай соьзлер айтады: «Мадина бек талаплы кызалык. Ол биринши кере аьризе берген эм 2000 балалар саныннан сайланганы коьп зат акында айтады. Ол бек талаплы, табиат пан савгаланган тавысы ман бала.Мен оны сол етимиси мен кутлайман, бизге- онынъ окытувшыларына сол уьйкен енъуьв».
Мадина буьгунлерде Рамазан Фаталиев туьзип, етекшилейтаган «Камерата» куьбиннинъ солисткасы болады.
Талаплы кызалак коьп ерлерде, туьрли сценаларда йырлап келеди. Ол язлыкта Дагестан Республикасынынъ МВД боьлигинде полиция куллыкшыларынынъ аьеллерининъ агзалары катнасып, озгарылган йыр шарасында да оьз талабын коьрсетти, республика кезегинде «Ана акында толгав» деген йыры ман биринши орынды алган.
Мадинадынъ аты, Айнара Нургишиевадынъ «Атайыма» деген Бальбек Аджибайрамович Кельдасовтынъ эстелигине багыслаган йыры ман, Интернет тармагыннынъ куьши мен савлай дуныяга белгили болган. Онынъ ярасык тавысы коьплердинъ коьнъиллерине етти демеге боламыз.
Аьли де алдыда Мадинадынъ йоллары ашык. Келеек йылда ол Турквизион шарасында катнасаяк. Сонда да ол оьзининъ оьнерин коьрсетер. Мадинадынъ аты юлдызлардынъ саьвлесиндей яркырасын деген йоравды этпеге суьемен.
Йолларынъ ашык болып, таза тынышлы аспан астында йырлаган йырларынъ тынълавшыга тек ийгилик аькелсин.
Г.Сагиндикова,
РФ журналистлер союзынынъ агзасы.
Суьвретте: М.Картакаева «Тавыс.Балалар» проекттинде катнаскан шакта.
