Янъыларда Дербентте каладынъ патшалык тарих –архитектуралык эм художестволык музей-заповедниктинъ конференц-залында туризмнинъ оьрленуьвининъ соравлары бойынша кенъес оьтти.
Дагестаннынъ туризм эм художестволык усталык бойынша министри М.Исаев оьз соьзинде буьгуьнлерде Дербентте туризмди оьрлендирмеге уллы куваты бар, бизим борышымыз сосы амалларды яшавга шыгарув. Сосы мырат пан муниципаллык инфраструктурады белсенли оьрлендирмеге эм эсли Дербенттинъ аьлемет тарих эм архитектуралык эстеликлерин таралтув уьшин баьри аьлиги технологияларды кулланмага тийисли экенин айтты.
Дербенттинъ администрациясынынъ аькимбасынынъ орынбасары М.Алиев, бу куьнлерде калада конакларды хош алмага аьрекет эткен конак уьйлердинъ саны аз тувыл экенин, эки туристлер негизи барын белгиледи. Онынъ соьзлери мен бу затлар Дербентке келмеге аваслыгы болганларды хошламага аз.
Кенъес исинде Дагестаннынъ Халк Йыйынынынъ депутаты В.Фаталиев, «Управление земельных и имущественных отншений»МКУ З.Эминов, Дербент патшалык тарих-архитектуралык эм художестволык музей-заповедниктинъ директоры А.Ибрагимов эм баскалар ортакшылык эттилер.
Олар бу куьнлерде туризм экономикадынъ ийги оьрленип келеяткан тармагынынъ бириси деп белгиледилер. Бир эллерде ол ис орынлар туьзуьвде маьнели орын тутады, экономикадынъ авыл хозяйство, промышленность тармакларын оьрлендируьвге себеп этеди. Кенъес катнасувшылары муниципаллык власть республикадынъ етекшилеви мен бирге тыс эллердинъ сулыбын, эсли Дербентти туристлик орталыкка айландырмага кулланарлар деп деп сенимлерин айттылар.
Кенъесте Дербент патшалык тарих-архитектуралык эм художестволык заповедниги «Дербент -2000» туристлик орталыгы ман тар байланыс тутув бойынша Келисуьвге кол басылды. Официаллык документке кол белгиленген учреждениелердинъ етекшилери А.Ибрагимов эм П.Наметуллаев бастылар.