Мавлидин Ильясович Шангереев Ногай районынынъ Карагас авылында 1956-ншы йылдынъ 4-нши ноябрь айында тувган. Окувын тамамлап, ол Махачкалада авыл –хозяйстволык техникумынынъ ветеринарлык фельдшери кесписин байырлайды. 1977-нши йыл яс специалист оьзининъ ис аьрекетин Карл Маркс совхозында ветеринарлык фельдшери болып баслайды.

Яс аьскер сырасында кие борышын яваплы толтырып, 1980-нши йылдан ветеринар болып Нариман авылында № 1Путь Ленина совхоз боьлигинде ветеринар врачы аьрекетин баслайды. Билимин оьстируьв мырадта, 1986-ншы йыл ол тав авыл хозяйстволык институтына туьседи. 1992-нши йыл ветеринар врачы кесписин байырлайды. Сайлаган кесписи бойынша «Путь Ленина» совхозынынъ бас ветеринар врачы куллыгын юритеди. 2001-нши йылдан алып Ногай район «Наримановский» ветеринарлык управлениесининъ участок етекшиси аьрекетин каьрлейди.  Авыл хозяйствосында эткен ийги косымы уьшин М.Шангереев ДР ветеринария бойынша комитети атыннан баалы савгалар ман, сый грамоталар ман, премиялар ман савгаланган. 2014-нши йыл М.Шангереевке Ветеринарлык куллыкшыларынынъ куьнин байрамшылавы ман байланыста эм аграрлык комплексининъ тармагында коьп йыллар намыслы эткен коьримли иси уьшин РФ авыл хозяйствосынынъ министерствосы атыннан разылык хаты тапшырылган.

Ол сыйлы аьрекетшиси болып калмай, коьримли аьел иеси де болады. Ол доьрт аьвлетин тербиялап, оларды яшав йолына салды. Онынъ увылы Арсланбек Шангереев те атасынынъ йолын кувып, тав авыл-хозяйстволык институтын тамамлап, ветеринар врачы кесписи бойынша сулыбын байытып келеди. Анадан коьрген тон пишер, атадан коьрген ок йонар дегенлей, ол да Ногай районынынъ ветеринарлык управлениесининъ тармагында аьрекет этип келеди.

 М.Шангереев ис йолдасларынынъ арасында уьйкен сый-абырай казанган. Ол аьр кимге де йогары коьнъил мен карайды, ис йолдаслары болса, онынъ акында тек ийги атанадылар.   

Ногайский район ветеринарлык управлениесининъ ис коллективи.

Суьвретте: М.Шангереев.