Оьткен юма Ногай район маданият уьйинде коьшимли малшылык ерлери мен байланыста Терекли-Мектеб авылдынъ гражданлар сходы болып озган.
Сходта «село Терекли-Мектеб» СП МО аькимбасы Зейдулла Аджибайрамов, ерли администрациясынынъ Ясуьйкенлер советининъ председатели Шатемир Мунгишиев, авыл яшавшылары катнастылар.
Сходты Ш.Мунгишиев ашты эм юритти. Авыл аькимбасы йыйылганларды быйылдынъ 11-нши курал айында Дагестан Оькиметинде юритилген йыйыннынъ протоколы ман таныстырды. З.Аджибайрамов бу сход инициативли туьркимнинъ аьрекети мен сол протоколда белгиленген Ногай районынынъ коьшимли малшылык ерлери акында аьзирленип турган Россия ногайларынынъ кезекли съездине делегатларды айырув ман байланыста оьткерилуьвин билдирди. Соны ман бирге ол йогарыда белгиленген протокол аьрекети токтатылганын да эске салды.
Сходта Терекли-Мектеб авыл яшавшылары, инициативли туьркимнинъ ваькили Фазиль Черкесов, предприниматель Арсен Култаев, Шатемир Мунгишиев, район УСЗН фондынынъ етекшиси Мавли Бекбулатов, Терек казак аьскерининъ Ногай юрт ямагатынынъ атаманы Арслан Бекмурзаев, «Кыпшак айы» ООО етекшиси Балманбет Рахмедов, «Ногайский район» МО аькимбасынынъ маслагатшысы Кайнадин Суюндиков, район маданият боьлигининъ начальниги Яхья Кудайбердиев, авыл Депутатлар йыйынынынъ председатели Рустем Гапаров шыгып соьйлегенлер.
Баьри шыгып соьйлегенлер де ерли ногай халкынынъ ойы ман санаспай, коьшимли малшылык ерлери акында соьз юритилуьви дурыс тувыл экенлигине, сондай маьнели соравлар ойласылганда ерли яшавшыларга белсенли, аьрекетшил болмага, оьз кызыксынувларын яклап билмеге, оьткир ер соравларын шешуьв уьшин ортак миллет фондын туьзбеге керегин айттылар. Солай ок сходта Ногай шоьллигининъ табиат, туьрли социал-экономикалык маьселелери акында да соьз юритилди.
Сходтынъ тамамында Россия ногайларынынъ кезекли съездине авыл яшавшылары сырасыннан делегатлар сайланды.
М.Ханов.