Оьз кесписине алаллыгын ыспатлап
Сондай да йынттай, наьзик, юка келген кызалак бир неше аьдемлердинъ яшавга энуьвине себеплик эткен десек буьгуьнлерде оьтирик те болып коьрингендей болады. Ама шайытлар да бар, сол яс акушеркадынъ колына туьскен балалар буьгуьнлерде оьзлери ата-аналар, белки атай-тетейлер де боганлар да болса да ярайды.
- Узактагы 70-нши йыллар эди. Мен медициналык окув ошагын уьстинликли битирип, ис аьрекетимди Карагас авыл больницасында басладым. Элбетте, енъиллерден тувыл эди. Куллыгым да бек яваплы эди, - деп ис аьрекетин баслаган йылларын эсине алады Ханифа Исмаил кызы Эльгайтарова. Ол оьзининъ яшавынынъ 45 йыллардан артык заманларын медицина тармагында озгарып келеди. Ол бу йыл оьзининъ 70 йыллык мерекесин де белгиледи, ама суьйикли кесписинде аьли де белсен аьрекетин бардырады.
Сол шаклы ис йыллары ишинде кайдай аьдемлер мен де иследи.
- Ис орынларды да сол тармак ишинде авыстырмага туьсти, баслап Солтанбек Акимович Аджиковтынъ етекшилеви астында ислемеге туьсти. Ол мага насихатшы болган десем де оьтирик тувыл. Аьр исиме оьз белгисин берип, анъламаганды анълатып иследик, -дейди Ханифа-абай.
Ханифа Исмаил кызы Карагас авыл больницасында коьп ислемеди, сонъ Терекли-Мектебке орталык больницадынъ инфекциялы боьлигине медсестра болып шыкты.
- Мунда да мени сол йылларда бу боьликти етекшилеген Таймасхан Кантемир увылы Тенгизов йылы йолыкты. Сонда Апузар Кульчимаева ман бирге татымлыкта, тыпаклыкта ис аьрекетимизди бардырдык, -деп хабарын бардырады сулыплы медицина куллыкшысы.
Ханифа Исмаил кызы Эльгайтарова бек яваплы куллыкшысы. Ол дайым да куллыгын бир иркуьвсиз, толыстырып этетаган аьдем. Сол этилген исинде янъылыс та йибермеске бек шалысып ислейди. Онынъ яваплыгын биз оьзимиз де бир неше кере коьргенмиз. Олай дегеним, Ханифа-абайга Ногай ЦРБ-дынъ санпросвет куллыкларын да юритпеге туьскен. Ол бизим газета бетлеринде туьрли, аьдемлерге кавыфлы авырувлар акында билдиретаган,
солардан кайтип сакланув йорыкларын анълататаган макалаларын аькелетаган эди. Сол макалалар баспаланып шыкпай турып, ол парахатлык таппас эди. Биз – ясларга куллыгынъызга сахый караманъыз, заманы ман макалалар баспалансын деп туратаган да эди.
Ногай ЦРБ-сынынъ санпросвет куллыкларын да Ханифа Исмаил кызына юритпеге туьске.
- Бу куллык мага – бир неше йыллар медсестра аьрекетин бардырган аьдемге де янъы зат эди. Бу ерде мен талаплы, билимли врач Асрет Сарсеевна Абдурахмановага уьйкен разылыгымды билдиремен. Ол мени коьп затларга уьйреткен,- дейди хатын.
Ханифа-абай ис йыллары ишинде санэпидстанциясында да куллыгын бардырган. Мунда ол бас врач А.Мутаировадынъ коьмекшиси болып 12 йыл узагында иследи. Кайсы ис орында ол аьрекетин бардырса да, ис орын оны тувыл, ол ис орынды ярасыклап келди.
Ханифа Исмаил кызы Таймасхан Ибрагим увылы Эльгайтаров пан аьел курып, эки балады яшав йолына шыгарды.
Бу йыл Ханифа Эльгайтарова 46-ншы кере ис орнында, суьйикли кесписин юрите келип, медицина куллыкшысынынъ куьнин йолыгады. Бу куьн биз сулыплы куллыкшыга уьстинликлер, узак оьмир йораймыз. Яшавынъызда ярык куьнлер эм туьнлер аьли де коьп болсынлар. Сиз бизим яс несилге уьлги эм насихатшы боласыз.
Г.Курганова.
Суьвретте: Х.Эльгайтарова ис орнында.