Буьгуьнлерде савлай дуныя коронавируслы инфекциясы ман куьрес юритеди. Мараздынъ яйылувын токтатув керегин баьримиз де анълаймыз. Биз, врачлар, бу куьресуьвде коьтергишлевди яшавшылардан куьтемиз, олар оьз гражданлык борышын толтырып, вакцинацияды оьтсе, маразды токтатпага амаллар болар эди.
Статистика бойынша пандемия заманында Дагестан Республикасында 2713 аьдем оьлген. Бу санлар бизди тынышсызландырмай болмайды. Ызгы эки юмадынъ ишинде республика бойынша 151 аьдем коронавируслы инфекциясы ман авырыган деп белгиленеди. Буьгуьнлерде биз маразды токтатув акында ойламага керекпиз.
Сонынъ акында 25-нши октябрьде Дагестан Аькимбасы Сергей Меликовтынъ етекшилиги мен оьткерилген республика еринде янъы коронавирус юкпалы маразынынъ таралувына карсылык этуьв бойынша Оперативлик штабынынъ кезексиз йыйынында билдирилген.
Ногай район япсарларында коронавируслы маразды кенъ яйылдырмас уьшин юритилетаган шаралар аьли де бардырыладылар. Ногай районы бойынша Россия МВД боьлигининъ куллыкшылары ман «Ногайская ЦРБ» ДР ГБУ араларында тар байланыс тутылады.
Бу яйылатаган коронавирус маразы тек бизим районымызда, регионымызда, элимизде тувыл, савлай дуныя юзинде куьш алып, тагы да ясарып, кенъ яйылып келеди. Сол кавыфлы маразына карсы турувда биз савлайымыз да биргелеспеге керекпиз.
Ногай район администрациясынынъ кенъеслер залында болып оьткен кезекли аппарат йыйынында сав элдегиндей болып, район еринде юритилип турган халк санын язув исининъ барысы, коронавирус юкпалы маразынынъ таралувы ман байланыслы туьзилген аьллер акында эм баска соравлар ойласылды.
Бу мараз кенъ яйылып басланганда, аьр аьдем оьзининъ ден савлыгын саклар уьшин коьп куьш салды: сарымсак ашап, имбирь мен, лимон ман шай ишип турды. Бир йыл ярым ишинде сосы мараз сырагыларын коьрип, анъладылар:бу авырувды енъмеге болады, тек вакцинация ярдамы ман.
Омаргаджи Шахбанов, Шуьмлелик авылынынъ орта мектебининъ директоры: – Бизим тынышлык яшавымызга бу кавыфлы инфекция киргенде, бизим элимиздинъ етекшилигининъ тапшырмасы бойынша аталык илмисининъ айтылган аьдемлери бу вакцинады туьзгенлер. Сонъында билингенлей, буьгуьнге савлай дуныя бойынша бизим «Спутник V» вакцинасына усаслы вакцина йок. Шет эллер бу вакцинады бизден куьби мен сатып аладылар.
Савлай дуныя бойынша коронавируслы инфекциясы яйылып турган заманда, биз, дуныя яшавшылары, йигерли эм билимли медициналык куллыкшылары ман бирге авырувды йойытув уьшин баьри амалларды коьрмеге борышлымыз. Район бойынша организациялардынъ эм учреждениелердинъ куллыкшылары ман бирге район пенсионерлери де вакцинация эттирдилер. Соьйтип, Терекли-Мектеб авыл яшавшылары Алыпкаш Мутали увылы эм Бурлият Биарслан кызы Джумакаевлер де вакцинады алдылар.
