Май байрамы алдында, ийги совет аьдетине коьре, элимиздеги авыл-калалардынъ орамларын, паркларын, эстеликлерин коьрклендируьв, аллеяларды тазалав ислери юритиледилер. Сол зат, бир соьзсиз де, тоьгеректеги яшавга янъылык косады, аьдемлердинъ коьнъиллерин коьтереди.
«Село Терекли-Мектеб» СП МО администрациясындагы парк исшилер бригадасы сав йыл узагы район орталыгын коьрклендируьвге оьзлерининъ ис уьлислерин косадылар. Олар кайсы заманда да; кысы, язы ис аьрекетинде.
– Бригада исшилери Якуб Назаров, Камиль Муллаев, Салим-Солтан Муждаков, Еминат Ярлыкапова, Марина Аджиниязова, Емисхан Аджиниязова, Залина Янгишиева район паркындагы картайган тереклерди пышувда, соларды йыювда, парк аллеяларын сыпырувда, авылдынъ орталык орамларын тазалыкта саклавда белсенли катнасадылар, – дейди авыл администрациясы аькимбасынынъ хозяйство ягыннан орынбасары Енали Янгишиев.
Май байрамлары алдындагы куьнлерде парк исшилеринде куллыклары коьбееди. Кайтип айтсак та, байрам – ол байрам эм соны тийисли кепте йолыгув эм аткарув тек исшилердинъ тувыл, сав ямагатымыздынъ борышы.
Суьвретте: парк исшилери куллык аьсеринде.
