Оьз янын, сулыбын, кыйынын, билимин аямай окувшыларга берген аьр бир окытувшыга «Иси мен ярасык аьдем» деп айтадылар. Калинин авылынынъ ана тилининъ эм адабиатынынъ окытувшысы Рамзия Ахмат кызы Акбердиева сондай аьдемлердинъ бириси демеге болады. Мине 35 йылдан артык яныплы кыскаяклы сосы мектебке савлай куьшин берип келеятыр.
Рамзия Ахмат кызы асылы ман – Калинин авылыннан. Онынъ яслыгы бу авылда оьткен. Мектебти уьстинликли окып тамамлап, ол Карачаевск каласындагы педагогикалык институтынынъ филология факультетинде окыйды. Талаплы студент институтта озгарылган шараларда да, конкурсларда да белсенли катнаскан. Солай ок ол онда окыган йылларында бир неше Сый грамоталар ман савгаланган. Пединститутты уьстинликли окып тамамлап, Рамзия Ахмат кызы тувган мектебинде ана тилининъ эм адабиатынынъ окытувшысы болып ислеп баслайды. Мектебте ислеятып, яс кыз оьзининъ наьсибин де табады. Ол Актай Сарайдар увылы ман танысып, уьйкен татым аьел курады. Олар эки балады оьстирип, билим берип, аякларына тургыстадылар. Экеви де, ата-анасынынъ йолын кувып, шалысып ислейдилер. Буьгуьн Актай ман Рамзия Акбердиевлер алты уныкларына, йиенлерине карап, куьезленип турадылар.
Рамзия Ахмат кызы мектебте мерекеши язувшыларга кешликлер озгарады. Озган йыл болса, шаир кызымыз Кадрия Темирбулатовадынъ 70 йыллыгына багысланган кешлик уйгынлады. Онда районымыздынъ туьрли авылларыннан конаклар келдилер. Белгиленген кешлик бек кызыклы оьтти.
Рамзия Ахмат кызы «Тулпар» кружогын юритеди. Бу кружокта окувшылар уьйкен аваслык пан катнасадылар. «Тулпар» кружогынынъ катнасувшылары озгарылган конкурсларда баргылы орынларды бийлейдилер. Олар – 7-нши класс окувшылары Дженнет Абдулсаметова, Радима Казгереева, 9-ншы класс окувшысы Залина Манапова.
Рамзия Ахмат кызы ис йолдаслары, ата-аналар арасында сый-абырай ман пайдаланады. Ол «Дагестан Республикасынынъ ат казанган окытувшысы» деген атка тийисли болган. Онынъ окувшылары туьрли тармакларда ислейдилер. Дайым да мектебке йолыгысларга келедилер. Олар, оьзлерининъ окув йылларын эслерине алып, окытувшылары ман боьлиседилер. Бу йылдынъ навруз айында Рамзия Ахмат кызы 60 йыллык мерекесин белгиледи. Биз оьзимиздинъ ис йолдасымызды сыйлы мерекеси мен кутлаймыз.
Кутлы болсын алпыс яс,
Ол коьплерде аьли йок,
Толы болсын сыпырада ас,
Коьнъил болсын аьр куьн ток.
Алпыс ястынъ куьези,
Саьвле болып тоьгилсин.
Савлык, наьсип йораймыз,
Оьмиринъ узак болсын.
Г.Янгазиева,
Калинин авыл мектебининъ окытувшысы.
Суьвретте: Р.Акбердиева.
