Олар экеви де сав яшавын берекетли исте озгарганлар: Маутали акай – халк хозяйствосында, Салимет Бает кызы авыл мектебинде.

Бизим ис йолдасымыз Салимет Бает кызы тийисли тыншаювга шыкканша дейим баьри куьшин-билимин балаларды тербиялавга багыслаган, баслангыш классларда дерислер юриткен. Мектебти уьстинликли кутарып, окытувшы боламан деп мырат эткен яс кыз Буйнакск каласындагы педучилищеди окып тамамлап, тувган авылына кайтады.

Узакламай авылдынъ Маутали атлы ясы ман аьел курады. Олар бес балады асырап, аякларына тургысттылар. Буьгуьнлерде ясуьйкенлеримиз балаларынынъ балаларына куьезленип турадылар. Ис йолдасымыз Салимет Бает кызы авыл мектебинде 40 йылдан артык заман иследи. Сол йыллардынъ ишинде ол коьримли кепте куллык этти, коьп балаларга билим берди.

Бу куьнлерде де ол тувган мектеби мен байланысын йоймайды, озгарылган шараларда катнасады, оьзи окытып, яшав йолын коьрсеткенлер мен йолыгысады.

Бу йыл Маутали эм Салимет Кельдасовлар 75 эм 70 йыллык мерекелерин белгилейдилер. Биз авылымызда сондай коьримли аьеллер болганына оьктемсиймиз эм ясуьйкенлеримизге ден савлык, наьсипли оьмирди йораймыз.

Г.ЯНГАЗИЕВА, окытувшы.

Суьвретте: Маутали эм Салимет Кельдасовлар.