Мен боларман йылытпага оьзинъди,
Юрегинъде шилле куьнде буз болса.
Колларым ман сыйпар эдим юзинъди
Ер юзинде, сен, аявлым, бар болсанъ.

Мен боларман баьлелерден коршалап,
Ызалардан даяналмай кыйналсанъ.
Узак йолдан алар эдим кушаклап,
Ер юзинде, сен, аявлым, бар болсанъ.

Мен боларман суьйим отта янмага,
Яманлардынъ соьзлерине сатпасанъ.
Юрегинъди салар эдинъ аяма,
Ер юзинде, мен, аявлым, бар болсам.
Г.Бекмуратова.