Тыныс алув муьшелерди саклайык

Савлай шаркты шыныктырув.

Бурын-тамактынъ, бронхилердинъ эм оькпединъ куллык этуьвин ийгилендируьвге каратылган процедуралар.

Тыныс алув муьшелердинъ ийги куллык этуьвине тийисли аьллер туьзуьв.

Таьмекиди коймага тийисли экени аян, неге десе ол тыныс алув муьшелерди тувра бузады. Таза авада кыдырув, уьйди заман-заманы ман таза авага толтырув – бронхиттен, оькпеге сувык тиювден саклайды. Дурыс эм толы пайдалы тамакланув – туберкулездынъ алдын шалмага коьмек этеди.

Бурыннан тыныс алувдынъ пайдасы коьп:  бурыннынъ ишиндеги табиат  «фильтрлер»  авырув тувдыратаган микробларды токтатады, бронхилерге эм оькпеге баратаган сувык авады йылытады.

Тыныс алув гимнастикадынъ да пайдасы уьйкен. Тек оны ман каьр шеккенде сак болмага, врач пан маслагатласпага тийисли.

Ингаляциялар уьшин дарман оьленлер эм эфирли майлар  кулланадылар. Тек оларды кулланганда да эсте сакламага керек: олардан аллергия болып, аьдем туншыкпага болады.

Солай ок, инфекция шаркка кетпесин деп  авыз-бурыннынъ ишиндеги авырувларды  заманында эмлемеге, стоматологка заманында бармага тийисли.

Флюрография кавыфлы авырувды заманында билмеге амал беретаганын бир де мутпанъыз.

Уьйдинъ ишин таза саклав, сувлы амаллар ман ювув тыныс муьшелерди шанъ ман бирге киретаган микроорганизмлерден саклайды.

Уьй  оьсимликлер де (боьтен де уьйкен япыраклылар) авады кислород пан канагатлайдылар эм авырув тувдыратаган затларды йойытадылар. Ама уьй оьсимликлерди кулланганда да аьдемге сак болув керек. Олар ябык ерде  айлак коьп болса да, каранъа мезгилде, кислородтынъ етиспевине аькелмеге болады.

Авырув коьп мезгилде аьдемлер йыйылган ерлерге бармаска яде марлядан байлавыш кулланмага  шалыспага тийисли, неге десе тыныс алув муьшелердинъ  авырувлары авадан югады.

К.САБУТОВА, врач-терапевт.