Гульсина Карагулова окытувшысы Алтын Даутовна ман бирге «Савлайроссиялык конкурсынынъ регионаллык кезегининъ енъуьвшилерине баргылар тапшырувга деп Москва каласына шакыртылган. Баргылар тапшырувга багысланган шатлыклы шара Москвада Билимлендируьв министерствосында оьткен.
Мунда Алтын Агаспарова Разылыкты эм Гульсина Финалист дипломын Ортак билимлендируьв тармагында патшалык политикадынъ департаментининъ директоры Андрей Петровтынъ колыннан алдылар. Баьри шатлыклы шарадынъ катнасувшыларына эки куьн узагына туьрли программалар уйгынланды. Солай ок, районымыздынъ окытувшысы ман окувшысы олар ман бирге Москва каласы ман кыдырып, Кызыл майданда, Воробьевы тавларда, Зарядье паркында, Китай-город районында, Кидзания паркында эм баска ерлерде болдылар. Коьп ярасык эм кызыклы затлар коьрдилер. Гульсина Владивостоктан, Шешен эм Карашай-Шеркеш Республикаларыннан янъы кыймаслар тапты.
Гульсинадынъ орыс тилиннен окытувшысы Алтын Агаспарова Москва каласында белгиленген шарага бармага карыж яктан коьмек эткен «Ногайский район» МО администрациясынынъ аькимбасы М.Аджеков эм онынъ орынбасары Б.Ярлыкаповка уьйкен разылыгын билдиреди. Солай ок, район етекшилери окытувшы ман окувшыды район администрациясына шакырып етискен уьстинликлерин Сый грамота ман белгилегени уьшин де савболын айтады. Солай ок, ол Андрей Петровтынъ атыннан Баймагомед Ярлыкаповка Разылыкты еткерди.
Бу конкурста енъуьви Гульсинадынъ биринши уьстинлиги тувыл. Кызалак озган йыл ятлав окув конкурсында катнасып, «Китапке ода» окып школада 1-нши орынды бийлеген, туьрли халклар ара дистанционный конкурсларда катнасып, 2-нши, 3-нши дережели дипломлар ман савгаланган. Ол Сраждин Батыров атындагы саниятлар мектебинде анъ школасында билим алган. Онда окыган йыллар Гасанов атындагы 18-нши, экинши йыл 19-ншы пианистлер республикалык конкурсында катнасканы уьшин Сый грамота ман савгаланган. Солай ок, бу йыл Халклар ара «Олимпис» олимпиадасында катнасып, 2-нши дережели диплом ман савгаланган.
Гульсина Карагулова туьрли конкурсларда катнасып эм ийги окып та уьлгиреди. Биз, ога келеекте аьли де енъуьвлер эм окувында уьстинликлер йораймыз.
Н. Кожаева.
Суьвретте: Г. Карагулова окытувшысы А. Агаспарова ман.
