• Сегодня: Четверг, Декабрь 9, 2021
  • Буьгуьн: Киши юма, 9 Карагыс айы, 2021

Билимли кыздынъ уьстинликлери

Голос Степи
Октябрь30/ 2020

Белгили окытувшы, язувшы В.Сухомлинский айткан: «Саьбий – аьелдинъ бияласы, сув тамшысында куьннинъ коьзи коьрингендей болып, балаларда ата-анадынъ эдап тазалыгы коьринеди». Соьйтип, бала кишкей заманнан алып кайдай тербия алса, сол яшав бойынша онынъ кайдай аьдем болаягына демевлик этпей болмайды. Тахир эм Татьяна Даутовлардынъ аьелинде 3 бала тербияланадылар – Залина, Амин, Азалия, олар шоьлимизден узак ерде орынласкан, каты кыс болатаган Сургут каласында яшайдылар. Таня орыс миллетли болса да, ногай яс пан бактысын байлаганнан сонъ, ногай аьдетлерин тутады, балалар эки тилде де соьйлейдилер. Оьзи кесписи бойынша тербиялавшы болганга коьре, саьбийлерине уьйде де ийги тербия бермеге баьри амалларды да тутады. Эртенъликте балалар зарядка этедилер, сонъында Залина – мектебке, кишкейлер – балалар бавына барадылар.

Залина – экинши класс окувшысы, ол Ф.Салманов атындагы гимназияда окыйды. Биринши бала окувга барган – ата-анага кайдай уьйкен куьез, сол куьннен алып олар мектебтинъ ямагат яшавында белсен катнасадылар. Тахир де спорт ярысларда кызы ман бирге кыргыйды, шоршыйды. Биринши класстан алып Залина оьзин билимге ымтылыслы кызалак этип коьрсетеди. Сол затка онынъ коьплеген грамоталары, дипломлары шайыт болады. Уллы Енъуьвдинъ 75 йыллыгына багысланган Савлайроссиялык «Сен – гений» деген конкурсында Залина эки номинация бойынша катнасып, «суьврет» номинация бойынша – I дережели эм «ятлав» номинация бойынша – II дережели дипломларга тийисли болды. Оннан баскалай, ол Савлайроссиялык «Билимлер заманы» викторинасында, регионлар ара «Куьн саьвлеси» интернет-олимпиадада баргылы биринши орынды алган. Янъыларда Залина Даутова Савлайроссиялык куьзги гербарийлер эм шешекейлерден этилинген ислерининъ «Куьзги мозаика» конкурсында катнасып, «Куьз бийкединъ юмарт савгалары» деп аталган куьзги гербарий туьзгени уьшин биринши орынды алган.
Уьйде де Залина токтап турмайды, окувын этип болган сонъ бисер мен тигеди, ясайды, оны ман бирге бебелери Амин эм Азалия да ясайдылар, «конструктор» ойыннынъ алатларыннан туьрли курылыслар этедилер.
«Ким болаяксынъ?» деп сорайман Залинадан. Кызалак куьлемсирейди.
– Мен тербиялавшы яде окытувшы болмага суьемен, неге десе олар балаларды уьйретедилер, олардынъ куллыгы кыйын болса да, бек керекли эм сыйлы куллык, – дейди Залина. Кызалак мектебте аьрекетлейтаган туьрли кружокларга юреди, бассейнге барады, ол коьп затлар ман кызыксынады. Даутовлар балалары ман аьр дайым паркка барып кыдырадылар, табиат пан танысадылар. Йылдынъ доьрт шагы ман олар ийги таныс, аьр бир шактынъ оьзининъ ийги яклары бар экенин Татьяна Даутова балаларына анълатады. Олар сол шак акында ятлавлар окыйдылар, завкланып ойнайдылар.
– Залина коьп окыйды, аьлиги заманда ол анълайды, тек окыган аьдем билимли болады, тек китап пен досласканлар баьри затты да биледилер, неге десе билим – китап бетлеринде, – дейди Залинадынъ анасы Татьяна. Окымыслы кызалактынъ уьстинликлери аьли де алдыда, ога билим йолында тек ашык капылар йорайман.
Г.абдулакимова.
Суьвретте: Залина Даутова.

Яндекс.Метрика