Ногай районынынъ уьйкен келеектегиси бар

Район аькимбасы «Дагавтодор» патшалык учреждениеси мен Терекли-Мектеб авылдынъ Эдиге орамына 2 видеокамера ман 3 светофор эм орам ярыгы салынаягы акында келисуьв туьзилгенин билдирди. М.Аджековтынъ айтувы ман, бу саьли куьн ДР экономика эм территориаллык оьрленуьв министри Осман Хасбулатов Ногай район етекшилери мен йолыгысып, районнынъ социал-экономикалык оьрленуьвининъ бас соравларын ойласаяк. 

Район етекшиси дагестан эт продукциясы Иранда куьшли соралатаганы акында айтып, Иран ваькиллери бизим районымызга айырым эс беретаганын эм мунда олардынъ хыйлы экономикалык кызыксынувлары барлыгын билдирди. Соьйтип, ДР Оькиметининъ йыйынында да Ногай районынынъ уьйкен экономикалык келеектегиси барлыгы белгиленген. Быйыл 7-нши июньде Ногай районында Россия Президенти мен видеоконференция байланысы оьткерилмеге каралады. «Ол зат районымызга эндигиси федераллык оьлшеминде эс этилинип басланганын шайытлайды», – деп белгиледи М.Аджеков.

Район аькимбасы, солай ок район еринде былтыр айтылып озган индустриаллык паркы эндигиси республика бюджетиннен карыжланаягы акында тапшырув барлыгын да айтты. «Меним ойымша, буьгуьнлерде бу соравлардынъ баьриси де шешилмеге болаяк», – деген сенимин билдирди ол.

Кенъесте «Ногайский район» МР администрациясынынъ билимлендируьв боьлигининъ етекшиси Кайтархан Отегенова «Ногай районындагы мектеблерде ана тилин саклав эм оьрлентуьв» деген тема бойынша шыгып соьйледи. Онынъ айтувы ман, район билимлендируьв учреждениелеринде ногай тилди саклав эм оьрлентуьв бойынша айырым куллык юритиледи. Болса да ана тилинде грамматика эм адабиат окув китаплерининъ етиспевлиги бу ягыннан айырым оравлыклар салады. Район ямагат палатасынынъ председатели Эльмурза Саитов бу сорав неше йыллардан бери коьтерилип келсе де, аьлиге дейим де шешилмейтаганын айырым белгиледи.