Сессияда «Ногайский район» МР Депутатлар йыйынынынъ председатели Руслан Насыров, «Ногайский район» МР администрациясынынъ аькимбасы Мухтарбий Аджеков, онынъ орынбасары Хамидулла Саитов, район депутатлары, авыл аькимбаслары, организация, учреждение етекшилери, ямагат ваькиллери катнастылар.
Сессияга шыгарылган соравлар ойласылып басланганша, «Ногайский район» МР администрациясынынъ аькимбасы Мухтарбий Аджеков соьйледи. Онынъ айтувы ман, быйыл 14-нши увытта ДР Оькиметинде Ногай районынынъ социал-экономикалык аьллери акында сорав ойласылаяк. «Бу йолыгыста бизге белсенли ортакшылык этпеге эм баьри де маьнели соравларымызды коьтермеге керек», – деп белгиледи ол. М.Аджеков район депутатларына район администрациясына сенимлиги уьшин разылыгын билдирди, оьз ягыннан район администрациясы сол сенимди аклаягына соьз берди.
Муннан сонъ Р.Насыров «село Кунбатар» СП МО Авыл йыйыныннан йиберилген район Депутатлар йыйынынынъ депутатлары М.Карамурзаев пен К.Суюндиков оьз эрки мен депутаттан тайганы акында билдирди. Олардынъ орынларына «село Кунбатар» СП МО депутатлары Р.Адильгереев пен А.Менглиязов район Депутатлар йыйынына депутат этилинип йибериледилер деп белгиледи ол. Соны ман байланыста Р.Насыров сессиядынъ карарынынъ проектин окып эситтирди.
Сессиядынъ куьн йосыгы бойынша йыйылганлар алдында РФ МВД-нынъ Ногай районы бойынша боьлигининъ начальниги Абдурахман Койлубаев оьткен 2018-нши йыл бойынша боьликтинъ ис аьрекети акында эсап берди. Ол куьзде район эгин кырларында калдырылган пленкаларды йыйнатув бойынша туьзилген комиссия оьз куллыгын толы кебинде толтырмаганын дурыс белгиледи. «Пленкалар кайтип яткан, соьйтип аьли де ятыр», – деди ол.
Онынъ доклады бойынша район депутатлары 2018-нши йылдагы район иш ислер боьлигининъ куллыгына тийисли белгисин бердилер.
Сессияда район администрациясынынъ эсабына «TOYOTA» автомашинасын киргистуьв акында сорав бойынша «Ногайский район» МР администрациясынынъ аькимбасынынъ орынбасары Х.Саитов соьйледи. Ол йыйылганларга бу коьлик район администрация эсабыннан ыхтыярсыз алынганы акында судтынъ тамамлав карары бар экенин билдирди. «Аьлиги заманда автомашина район администрациясына кайтарылган», – деди Х. Саитов. Муннан сонъ район Депутатлар йыйынынынъ председателининъ орынбасары Увылбийке Шандавова район Депутатлар йыйынынынъ дайымлык комиссияларынынъ куллыгы акында сорав ман шыгып соьйледи. Ол аьли район Депутатлар йыйынынынъ 2-нши сессиясында билимлендируьв, авыл хозяйство, коррупция эм баска туьрли комиссиялары уйгынланганын эм солардынъ эндиги сыраларын туьрлентуьв кереги акында билдирди.
Сессияда район администрациясынынъ финанс боьлигининъ етекшиси Арслан Кусегенов шыгып соьйледи эм район бюджетин карыж яктан толыстырув йоллары акында хабарлады.
Сессиядынъ тамамында йыйылган район яшавшылары уьшин коьптен белгили эм «авырувлы» соравлардынъ бириси – коьшимли малшылык ерлери бойынша былтыр 30-ншы караша айында район етекшилери, депутатлары, политикалык партиялар, ямагат ваькиллери атыннан ДР Аькимбасы В.Васильевтинъ атына язылып йиберилген Хатына ДР муьлк министрининъ орынбасары язган явабын ойластылар. Бу сорав бойынша комиссия председатели Рашид Отарбаев, «село Терекли-Мектеб» СП МО аькимбасы Зейдулла Аджибайрамов, «Ногайский район» МР администрациясынынъ аькимбасы Мухтарбий Аджеков, район депутаты Рустем Гапаров эм баскалар оьз ойларын айттылар. Шыгып соьйлегенлер коьшимли малшылык ерлери акында район етекшилери эм депутатлары коьп ерлерге хатлар язып йиберсе де, буьгуьнлерге дейим тийисли явап алмайтаганын билдирдилер. Оьз ягыннан М.Аджеков сол йолыгысты уйгынлав уьшин ярдамын этеегине сендирди.
М.Ханов.
