Селим Тенболатович Кошетов 1998-нши йылдынъ 17-нши сентябрь куьнинде  тувган. Бала заманыннан алып яста билимге, спортка аваслыгы бар экени сезилди. 10-ншы классты Нефтекум районынынъ Коясыл авылында тамамлап, 2015-нши йыл Янъы Уренгой каласындагы коьп кеспили колледжине туьсип билим алады. Сол колледжде окув йылларында ол Ямало-Ненецкий Автономлык округынынъ Регионаллык ямагатлык организациясы «Вымпел Ямала» деген аьскершилик — патриотлык орталыгынынъ да тербияланувшысы  болады. Онынъ анасы Фаридага сол орталыгынынъ администрациясыннан разылык хаты да келген. Янъы Уренгой каласында «Руслан »деген балалар бавында (онда доьрт кадетлик куьплери кепленгенлер) «Вымпел Ямала» деген аьскершилик-патриотлык орталыгы ман «Ямальские стерхи» деген клубынынъ етекшиси де болган.

2017-нши йыл Селим  ГТО нормативлерин уьстинликли толтырганы уьшин алтын белгисине тийисли этилген. Ярыслар тамамлары бойынша Селимге авыр атлетикадан спорт устасынынъ кандидаты деген разряды да бериледи. Куьреслердинъ туьрли оьлшемли ярысларында коьп кере катнасып, баргылы орынлардынъ иеси де болган. Ногай яс коьп кере округ бойынша уьйретуьв-аьзирлик коьруьв «Арктические стрелки» эм «Десантный взвод» деген йыйылысларда оьзин ийги яктан коьрсетип, баслангыш аьскерлик аьзирленуьв курсын да етимисли оьткен. 2018-нши йылдынъ февраль айында «Мендей болып эт»  деген аьскершилик-патриотлык биригуьвлердинъ инструкторлары арасында кеспилик  усталыгы бойынша  лауреаты болган. Соьйтип, ол эр борышын толтырувга оьзин толы аьзирледи. 

Буьгуьнлерде Селим Москва областининъ Балашиха каласында Аьскер сырасында эр борышын намыслы толтырып келеди. Ол биринши куьннен алып оьзин тийисли аьскерши этип коьрсетип, аьскершилик яшавында белсенли катнасып, йолдаслары арасында аьдиллик эм алаллык пан баскаланып келеди.  

Келеекте де сага аьскерлик яшавында бийик етимислер, Селим! Йолынъ дайым ашык болсын!

Г. Нурдинова.
Суьвретте: Селим Кошетов.