БОРИС ИНАЛОВ

Бетинъ сенинъ ак кардай,

Буйра шашынъ кундыздай,

Юзинъ яркын юлдыздай,

Ян яйнаткан, сылув кыз.

Соьзге шешен тилинъ бар,

Бир увыстай белинъ бар.

Айга тенълес коьркинъ бар,

Ян яйнаткан, сылув кыз.

Терен акыл ойлысынъ,

Эр йигиттей янлысынъ,

Аьр исте сен данъклысынъ,

Ян яйнаткан, сылув кыз.

Коьзинъ кара юзимдей,

Куьлесинъ куьн коьзиндей,

Дуныяда тап сендей,

Йоктай коьрдим, сылув кыз.