Сессияды дагестан парламентининъ етекшиси Хизри Шихсаидов ашкан эм юриткен. Сессияды баслаятып, ол депутатларга каратылган соьзинде: «Элимиздинъ Президенти Владимир Владимирович Путин янъыларда Россия Федераллык Йыйынына каратылган Язбасында ислемейтаган пенсионерлерди материаллык ягыннан канагатлав беттен тувган тийиссизликлерди тайдырув керегин белгилеген. Сол зат Россия Федерациясында ярлылык пан куьресуьвге каратылган шаралардынъ бириси болады. Сол себептен Россия Федерациясынынъ Оькимети мен «Патшалык социаллык ярдамы акында» деп аталган Федераллык законынынъ 12.1-нши статьясына туьрленислер киргистуьв акында» деп аталган федераллык законы (ислемейтаган пенсионерлердинъ пенсияларына социаллык косымша тоьлевдинъ оьлшемин белгилев ягыннан) аьзирленген», – деди. Муннан сонъ сессияда «Патшалык социаллык ярдамы акында» деген федераллык законынынъ 12.1-нши статьясына туьрленислер киргистуьв акында» деп аталган федераллык законынынъ проекти акында ойлар» деген сорав бойынша доклад пан ДР Халк Йыйынынынъ Савлык саклав эм социаллык политикасы бойынша комитетининъ председатели Висампаша Ханалиев шыгып соьйледи. Ол «Патшалык социаллык ярдамы акында» деген Федераллык законынынъ 12-нши статьясы ман келисли аьлде токтастырылатаган эм тоьленетаган Россия пенсионерининъ киши ашавяшав оьлшеми кадириндеги пенсиясына социаллык косымша тоьлев деген зат, социаллык яктан коршаланмаган, ислемейтаган пенсионерлердинъ ярлылыгы ман куьресуьвге каратылган социаллык ярдам шараларынынъ бириси болатаганын билдирди. «Справедливая Россия» фракциясыннан шыгып соьйлеген онынъ етекшиси, парламент председателининъ орынбасары Камил Давдиев фракциядынъ ой-ниетин билдире келип, ислемейтаган пенсионерлер – олар яшавшылардынъ социаллык яктан энъ де коршаланмаган кесеги экенин белгиледи. Сонынъ уьшин фракция олардынъ аьлин ийгилендирмегекаратылган закон проектин хош коьретаганын билдирди. «Россия Федерациясынынъ Коммунистлер партиясы» фракциясынынъ агзасы Мурзадин Авезов фракция федераллык закон проектин макул коьретаганын белгиледи. Болса да, фракция гражданлардынъ пенсияга шыгув ясын оьстируьв пенсионлык реформасы олардынъ социаллык аьллерин ийгилендирмеди деп санайды деди ол. «Единая Россия» фракциясынынъ агзасы Зумруд Бучаева закон проектининъ йогары социаллык маьнелиги бар деп белгиледи, неге десе бирер регионларда янъы йылдан алып пенсияларга акша косылмаган яде аз-маз бир затлар косылган. Сондай дурыссызлыкка оьзининъ Федераллык Йыйынына каратылган Язбасында РФ Президенти маьне берген. Республика депутатлары белгиленген закон проектин бир тавыстан макул коьрдилер эм соны ман байланыслы токтасты кабыл эттилер. Сессияда баска туьрли соравлар да ойласылды эм тийисли карарлар кабыл этилинди.
