Ерли мектебте билим алып, 1997-нши йыл Хасавюрт педагогикалык колледжининъ Терекли-Мектеб авылындагы боьлигине туьсип, оны йогары етимислери мен 2001-нши йыл тамамлайды. Ол 2010-ншы йыл Санкт-Петербург каласында Пушкин атындагы педагогикалык университетининъ логопедия боьлигине окымага туьсип, йогары кеспиди байырлайды.
Кеспилик йолын яс кыскаяклы оьз тувган авылында баслангыш класс окытувшысы болып баслайды. Бакты кыскаяклыды элимиздинъ сырт бети Красноярск крайынынъ Норильск каласына аькелди. Мунда Гульнара 2005-нши йылдан алып 8-нши номерли мектебте вожатый болып, оннан сонъ 6-ншы номерли мектебте окытувшы, мектеб етекшисининъ тербиялав иси бойынша орынбасары, мектеб етекшиси болып та сулыбын оьстирип баслайды.
Сурдопедагог, дефектолог окытувшысы кесписин сайлаган кыскаяклы кулагы эситпейтаган яде осал эситетаган балалар ман аьрекет этип баслайды. Сондай саьбийлер мен ислев уьйкен кыйынлык тувдырады. Болса да, ол баьри иркуьвлерди де оьтип, исине савлай бериледи. Баслап ол исин баслаяктан алдын, оьз акшасына Ленинград областиндеги сагыр балалары билим алатаган баьри окув ошакларында да болып кетти. Норильск каласына коьп макалаларын йыйып аькеледи. Солардынъ негизинде ол ис программасын да туьзеди.
Гульнара дайым да кеспилик ярысларында ортакшылык этип келген, буьгуьнлерде сагыр балалары ман куллык этуьв бойынша макалаларын бир неше йыйынтыкларында шыгарган. Кыскаяклы оьз ис йолдаслары арасында етимисли окытувшы, онынъ дерисине окувшылар суьйип келедилер, ол кайсы дерисинде де коьрсетуьв амалламалары ман пайдаланып келген. Деристе коьрсетуьв амалламаларын кулланув, эситпейтаган яде осал эситетаган балалар уьшин бек маьнели эм пайдалы зат болады. Онынъ куллыксуьерлиги, терен аьдемшилиги, балаларды суьюви ис йолдаслары, окувшылары арасында сый-абырайын оьстирген.
Кайсы дерисин де Гульнара Абдурашидовна кызыклы этпеге сав куьшин салып келген. Ол мектеб яшавынынъ белсенли катнасувшысы болып, айтпага, «2013-нши йыл окытувшысы», «Мен энъ ийги класс етекшиси», «2013-нши йылдынъ тербиялавшысы», ийги педагогикалык проектлерининъ, Савлайроссиялык, кала бойынша озгарылатаган ярыслардынъ, туьрли фестивальлердинъ коьп кере енъуьвшиси болып келген.
Ол билимлендируьв куллыкшылардынъ кеспилик аьзирленуьвин эм билим дережесин коьтеруьв бойынша Красноярск край институтынынъ Норильск каласындагы боьлигинде тамада преподаватели де болып аьрекет эткен. 2016-ншы йылдан алып Гульнара «Единая Россия» партиясынынъ агзасы да болады. Норильск каласында 2017-2018-нши йылларда РФ Президентин, кала советине депутатларын, кырал Губернаторын сайлавларда да сайлав комиссиясынынъ агзасы да болган. Кеспилик аьрекетининъ тамамлары бойынша коьп кере Сый грамоталары ман эм дипломлары эм Разылык хатлары ман савгаланган.
Буьгуьнлерде, ол Норильск каласынынъ администрациясында яслар орталык боьлигин етекшилеп келеди. Онынъ буьгуьнге дейим етискен уьстинликлери бек коьп, ол оьзининъ яс болса да, бай сулыбы ман тоьгеректегилерге коьрим болып келеди.
Суьйген исинде етимисли куллыкшы болып калмай, ол наьсипли ана да болады. Терекли-Мектеб авылыннан Каирбек деген ногай яс пан курган татым аьелинде Камилла эм Ильяс аьвлетлери оьседилер. Олар мектебтеги етимислери мен ата-анасынынъ куьезин оьстирмеге шалысадылар.
Келеекте де Гульнара Абдурашидовнага куллыгында бийик етимислер коьп болганын сагынамыз.
Г.Нурдинова.
Суьвретте: Гульнара Туркменбаева (Эльмурзаева).
