«Ак гуьл» иеси Гульнара

Кайсы аьдем де оьз яхшылыгын яркын кепте, эсте коьпке саклангандай эстеликли, шат, кувнак, коьзди сукланткандай коьрнекли этип аткармага суьеди. Бу ерде боьтен де яхшылыкка келген конакларынынъ алдындагы столларындагы берекетининъ оьзи де коьзге туьскендей, коьнъилди коьтергендей туьзилип салынганы бек маьнели. 
Терекли-Мектеб авыл яшавшысы Гульнара Беккишиева яс заманыннан алып, аьли кайсы бир байрамда да уьйдеги столына салатаган асларын коьрклендирмеге талап этетаган эди. Сол талабы сонъында онынъ уьйкен ярык ой-ниетине айланды. Тек сол ой-ниет туваяктан алдын ол бир йыл оьзининъ синълисининъ тойындагы столларын баскалардыкыннан туьрли эм яркын кепте ярасыкламага шалысты. Сол тойга келгенлер, боьтен де хатын-кызлар бу туьрленисти коьрмей болмадылар. Гульнара акында ийги соьзлер айтылды. Соьйтип онынъ коьнъили оьсти эм йогарыда белгиленген ой-ниети яркырап яшавга энди. Ол сол ниетин таныс аьдемлерге айтканда ок, олар колларын силтеп куьлдилер. «Пайдасыз ой, – дедилер олар ога, – оннан хайыр болмас аьлиги заманда». Болса да, Гульнара тек оьз юрегине тынълады. 2009-ншы йыл язда ол 5-6 аьдемнен кишкей куьп туьзип, исине таьвекеллик пен урынады. «Таьвекеллиге нур явар» дегенлей, онынъ сол аьрекети коьзге илинмей калмады. Гульнарадынъ куьбин бир яхшылыктан баскасына шакырып басладылар, ога оьзине ярдамга тагы да бир неше хатын-кызлар алмага туьсти.

– Буьгуьнлерде  мен  35-40 аьдемнен туьзилген столлар безек-лендируьвши 2 бригадады етекшилеймен, аьли 3-нши куьпке де кыскаяклыларды йыяман. Не уьшин дейсиз бе? Яз айларында бизде, айтпага, бир кеше ишинде бир неше яхшылык залларында тойлар озгарылады. Солардынъ баьриси де бирерде столларын безеклендирмеге бизди шакырады. Мен кызларымды бир неше куьплерге боьлип, соларга йиберемен. 

Гульнарадынъ сондай ой-ниети тек оьзине де тувыл, баскаларга да хайырын береди. Соьйтип, ол райондагы 35-40 кыскаяклыларга янъы ис орынларын да туьзген. Ис рыногы ягыннан аьлиги районда туьзилген авыр аьллерде онынъ сондай талабы кайсы ерде де макталмага тийисли. Онынъ колында буьгуьнлерде Терекли-Мектеб, Червленные Буруны, Карагас, Калинин, Ленинаул, Нариман, Кара-Сув авылларыннан хатын-кызлар куллык этедилер. 

Соннан бери 10 йыл оьтип туры. Аьлиги заманда Г.Беккишиева «Ак гуьл» («Белая роза») деп аталган оьз агентствосын етекшилейди. Столларды безеклендируьв сюжетлерди ол Интернеттен, журналлардан, неден карап алмайды.  

Г.Беккишиева йогарыда белгиленген аьрекетиннен баскалай, янъыларда белгили байрамлар, эстеликли куьнлер мен байланыслы корпоративлер уйгынлап оьткеруьвге де киристи. Соьйтип, ол 2017-нши йылдынъ карагыс айынынъ ызгы куьнлеринде янъы 2018-нши йылды йолыгув ман байланыслы байрам шарасын озгарган. Быйыл да соьйтип этти. Тек янъыларда 2-нши увыт куьнинде оьз авылларында мектеблерди окып кутарганлар ман аьдетли йолыгысларды ол бирге йыйнап, «Нур» яхшылык залында уйгынлап оьткерген. Сол куьн мунда быйыл Терекли-Мектеб, Карагас, Кумлы, мектеблерди окып кутарган мерекешилердинъ эстеликли йолыгысы шатлыклы аьлде озган. Сондай корпоративлерге соларды юритуьвшилерди, йырлавшыларды эм биювшилерди ол оьзи шакырады.

Тек янъыларда Г.Беккишиева Халклар ара хатын-кызлар куьнинде де кыскаяклылар уьшин «Нур» яхшылык залында тыншаюв кешлигин озгарды. Сонда патшалык «Айланай» фольклор-этнографиялык ансамбли толы сырасы ман, етекшиси Мурат Ваисов пан бирге ортакшылык эткенлер. Кешлик сырагысында Гульнара аьр бир хатынга бирер мимоза шешекей ыслатканы да бу кешликке айырым байрам саьвлесин косты. Сондай таьвекелли тири берекетли, ямагатка да пайдалы болмага шалысатаган хатын-кызлар халкымызда коьп болганын йорайман.

М.Юнусов.
Суьвретте: Г.Беккишиева (биринши сырада солдан экинши) оьзининъ ис йолдасларынынъ бир кесеги мен.