— Бизим боьликтинъ куллыкшылары бизге келетаган ясуьйкенлердинъ, сакат аьдемлердинъ яшав аьллерин кызыклы этер уьшин баьри куьшлерин де саладылар. Социаллык куллыклар бойынша боьлик специалисти ясуьйкен гражданлардынъ компьютер бойынша билимлерин оьстирер ниет пен заьлимдей куллыклар озгарды. Ол ясуьйкенлер мен янъы технологиялар деген темага багысланган дерислер, тестирование оьткерди.

Ясуйкенлер эм сакат аьдемлер мен сондай куллыклардынъ озгарылувы олардынъ сенимин оьстиреди эм яшав оьмирин узайтувга себеплик этеди.

«Ногайский район» МР администрациясындагы КЦСОН боьлигининъ куллыкшылары аьр бир озгарган дерислериннен сонъ, уьйреткенлериннен явап та куьтедилер. Олар берген материаллары бойынша тергев шараларын озгарадылар. Оьткен йылдынъ курал айында ясуьйкенлердинъ компьютер бойынша билимлерин тергев ниет пен муниципаллык кезегинде шара озгарылган эди. Сол шара бойынша енъуьвши де белгиленген.

Боьликтинъ ЛФК инструкторы ман да белсен куллык юритиледи. Ол куьн сайын боьликке келген ясуьйкенлер мен, сакатлар ман туьрли эмлев эм тазалыкты тутув гимнастикалар озгарады. Сонынъ уьшин боьликте туьрли тренажерлар да бар. Ясуьйкенлер мен гимнастика озгарганнан сонъ, олардынъ ден савлыгы да тергеледи.

Ясуьйкенлерге баслапкы куьнлерде кыйын болады, оннан сонъ олардынъ ден савлыгы да беркип, сол авырлыкка уьйренеди. Бизим боьликте бар тренажерларда аьрекет этуьв ясуьйкенлердинъ эм сакат аьдемлердинъ канын тийисли кепте айландырады.

Боьликте ис терапия бойынша инструктор да оьз аьрекетин йогары яваплылык пан бардырады. Ол ясуьйкенлердинъ кызыксынувларын коьтерип, туьрли аьрекетлер уйгынлап, оларды иске киргистеди. Керек болса, ясуьйкенлер боьлик ерлескен азбарда да куллык этедилер. Баьри аьрекет те мунда ясуьйкенлердинъ, сакатлардынъ козгалув тармакларын ислетуьвге каратылган.

Баьримизге де белгили болганлай, ясуьйкен аьдемнинъ яшавын кызыклы этуьв, олардынъ яс несилге кереклигин коьрсетер уьшин, бас деп оларга бизим йылы соьзимиз, катнасымыз, маьнели эс беруьвимиз керек болады. Ясуьйкен аьдемлер ялгызлыкта коьп турмага ярамайды. Олардынъ ялгызлыгын билдирмес уьшин, бизим куллыкшылар туьрли темаларга мастер-класслар, «ярасыклык дерислерин», эртеректен салынган программа бойынша хабарласувлар да озгарадылар. Солардынъ барысында ясуьйкенлер, сакат аьдемлер бир-бириси мен йолыгысадылар, тыпакласадылар. Соьйтип олардынъ яшавга кызыксынувлары да коьтериледи.

КЦСОН куллыкшылары байрам шараларын да кенъ белгилейдилер. Сол шараларды белгилев уьшин материаллык карыжлар керек болады. Бизим куллыкшылардынъ тилек салувлары ман спонсорлык ярдам этетаганлар да боладылар. Коьп шараларды озгармага бизге Ногай районы бойынша ФСЗН ярдамын этеди. Туьрли шараларды озгарувга спонсорлык ярдам этетаган аьдемлердинъ аьр бирисине биз шыгарган карыж бойынша эсап беремиз.

Язлыктынъ келуьви мен биз хатын-кызлар байрамын кенъ белгиледик, сол байрамга багысланган шарады озгармага бизге предпринимательлер Альфира Караева ман Сурия Даурбекова материаллык ярдам эттилер. Оларга уьйкен савболсынымызды айтамыз, — дейди ол КЦСОН куллыкшыларына спонсорлык ярдам этпеге ниети барлар сонъгы номерли телефонларга тел сокпага боладылар: 89285272134, 89282623488.

Мине сондай тыныш болмаган исти «Ногайский район» МР администрациясындагы КЦСОН куллыкшылары арымай-талмай бардырадылар. Элбетте, ис аьрекет борышын толтырмага, аьр бир мойнына алган аьдем, керек болады, тек соны юрек йылувлыгы ман толтырув ким болса, сога берилмеген. Бизим КЦСОН тармагымызда аьрекетин бардыратаган куллыкшыларга бизим газета бетлеримизде берилетаган разылык хатлар солардынъ йогары усталыгын коьрсетеди.

Зарема Оразбаевадынъ айтувына коьре, олар аьрекетин уллы шаири Расул Гамзатовтынъ «Басына кырав туьскенге йол бер, кишкей болса да, ярдамынъды эт, картлыктынъ не экенин оьзинъ де шак еткенде анъларсынъ», — деген соьзлерин шакырув этип, бардырадылар.

Г.Курганова.

Суьвретте: «Ногайский район» МР администрациясынынъ КЦСОН боьлигининъ куллыкшылары озгарган шара.