Ясылландырув эм коьрклендируьв — бас борыш

Онда авыллардынъ аькимбасларына, организациялар эм учреждениелер етекшилерине, дин куллыкшыларына, билимлендируьв учреждениелер етекшилерине этилинеек куллыклар тапшырылды. Айтпага, авыл аькимбаслары уьстимиздеги 2019-ншы йылдынъ 20-ншы мартына дейим авыл ерлерин ясылландырув эм коьрклендируьв, санитарлык тазалав бойынша айлык озгарувга нормативли-ыхтыярлык актлар алмага, ай узагына аьр юмадынъ бир куьнин ерди санитарлык яктан тазалавга багысламага, санитарлык тазалав уьшин ерди юридический эм физический лицоларга – иелерине, арендаторларга, ерлерди, меканларды кулланувшыларга беркитпеге борышландырылганлар.

Уьстимиздеги йылдынъ март-апрель айларында авыл поселениелер етекшилерине орам комитетлер агзаларын, авыл йыйынлар депутатларын яшавшыларды субботниклерде катнастырар уьшинанълатув озгармага, солай ок авыл ишиндеги, орманлар еринде тасланган кокысларды йок этер уьшин коьлем субботниклер озгармага, Уллы Аталык согысында ян берген аьскершилердинъ эстеликлерининъ касындагы майданларды коьрклендирмеге, олтыргышларды, реклама язылган такталарды ярастырмага, кокысларды тасламага урналар салмага, «Свалка мусора запрещена» деген язувлар ман аншлаглар аьзирлеп илмеге борыш салынды. Авыл аькимбаслары депутатлар йыйынынынъ сессияларында уьйдеги айванларды саклав бойынша йорыклары акында карарларды кабыл этпеге керек болдылар. Авыл аькимбаслары эм авыл имамлары оьликлерде субботниклер уйгынламага тийисли болдылар.

Авыллар аькимбаслары эм Ногай районы бойынша ОМВД-сына план бойынша уьстимиздеги йылдынъ март-апрель айларында авыл ерлерин кокыстан тазалав бойынша каралган шаралардынъ толтырылувын тергеп, рейдлер юритпеге, кокыслар таслап тоьгерек якты батырган аьдемлерди аянламага, оларды административлик дембиге йолыктырар уьшин туьзилген протоколларды районнынъ административли комиссиясына еткермеге борышландырылдылар.

Учреждениелер эм организациялар етекшилерине март-апрель айларында администрация меканларынынъ касындагы ерлерди тазаламага эм шешекейлер шашпага буйрык берилди. Ногай район билимлендируьв управлениесине уьстимиздеги йылдынъ мартапрель айларында билимлендируьв учреждениелерде «Ямагат ерлеринде тазалыкты тутув» эм «Шашылган оьсимликлерди аяп саклав» деген темаларга ашык дерислер озгармага керек болады.

«Яслык» яслар орталыгына районымыздынъ еринде тереклер шашув эм кокыстан тазалав куллыкларын юритер уьшин, яслардан волонтерлар отрядларын туьзуьв тийисли.

«Шоьл тавысы» республикалык газетасынынъ редакциясынынъ куллыкшыларына айлык озгарылувы акында макалаларды, солай ок авыллардынъ, учреждениелердинъ эм организациялардынъ касындагы ерлердинъ санитарлык аьлин коьрсеткен суьвретлерди де баспаламага керек болады. Бу йылдынъ май айында айлык озгарув бойынша район комиссиясы сонынъ сырагыларын келтиреек.