Ис аьрекетлерине йогары баа берилди

Шарадынъ барысында оьзлерининъ педагогикалык усталыгын районымыздынъ туьрли балалар бавларыннан тербиялавшылар: Джамиля Алимуллаева («Кызылгуьл» балалар бавы), Алтынай Ханмурзаева («Юлдуз» балалар бавы), Алина Ярболдиева («Ногай Эл» балалар бавы), Альбина Сагиндикова («Алтын кус» балалар бавы), Загидат Муталлапова («Шолпан» балалар бавы) коьрсеттилер. 

Шара эки куьн узагында озгарылды. Биринши куьн «Йыл тербиялавшысы» деген ат уьшин куьресеек тербиялавшылар оьзлери эртеректен аьзирлеген эссе мен видеоролик коьрсеттилер. Экинши куьн шарадынъ кызувлы шагы эди. Биринши куьннен алган куват экинши куьн тербиялавшыларга оьзлерининъ кызыклы дерислерин эм мастер классларын коьрсетпеге дем берди. 

«Йыл тербиялавшысы» шарасында бек билимлери яктан куьшли тербиялавшылар сынастылар. 

Шарадынъ тамамларына коьре биринши орынга «Ногай Эл» балалар бавынынъ тербиялавшысы, яс болса да, оьз исине яваплылык пан карайтаган, А.Ярболдиева, экинши орынга «Юлдуз» балалар бавынынъ тербиялавшысы А.Ханмурзаева эм уьшинши савгалы орынга «Шолпан» балалар бавынынъ тербиялавшысы З.Муталлапова тийисли болганлар. 

А.Максутова.
Суьвретте: «Йыл тербиялавшысы» шара катнасувшылары.