Алдымызга борышлар салынганлар

Бу йыйында ДР Халк Йыйынынынъ депутатлары Мурзадин Авезов, Мурат Мамаев, «Ногайский район» МР администрациясынынъ аькимбасынынъ кесек заманга куллыгын юритуьвши Хамидулла Саитов, район Депутатлар йыйынынынъ председатели Руслан Насыров, район аькимбасынынъ орынбасары Баймагомед Ярлыкапов, район активи катнастылар. Дагестан Республика Аькимбасынынъ Язбасы акында доклад пан «Ногайский район» МР администрациясынынъ Ямагат советининъ председатели Эльмурза Саитов шыгып соьйледи. Ол кыскаша республика етекшисининъ Язбасында коьтерилген соравлар, маьселелер, этилинип келеяткан эм алдыда этилинеек куллыклар, политика, экономика, социаллык яшавында юритилип турган туьрленислер акында айтты. Оннан сонъ депутат М.Авезов быйылгы республика бюджетининъ социалэкономикалык тармаклар бойынша шыктажлар ягы, сонынъ эсабында Ногай районына йиберилмеге каралатаган карыжлар акында соьйледи. Айырым кепте ол Россия МВД Ногай районы бойынша боьлигининъ етекшиси акында сорав бойынша республика иш ислер министри мен  йолыгысканын эм ога район яшавшылары бу яваплы ис орынында ерли миллеттинъ ваькили болганын талаплайтаганын билдиргенин айтты. М.Авезовтынъ соьзи мен, министр Ногай районында ногайлар коьп болганы ман байланыста бу сорав ерли миллеттинъ пайдасына шешилеегине сендирген. ДР Халк Йыйынынынъ Курылыс, коьлик эм ЖКХ бойынша комитетининъ председатели Мурат Мамаев Дагестан Аькимбасынынъ Язбасында республика ямагаты алдына салынган маьнели борышлар акында белгиледи. Ол районда янъы мектеблер эм балалар бавлары курылмага тийисли авыллар сондай курылысларга ерлер белгилемеге эм тийисли документлер аьзирлемеге борышлы экенине эс эттирди. Йыйыннынъ тамамында Х.Саитов янъыларда «Ногайский район» МР администрациясы ДР Экономика эм территориаллык оьрленуьв министерствосы атыннан Сый грамотасы ман савгаланганы акында билдирди эм сол грамотады район администрациясынынъ экономика боьлигининъ етекшиси Равзият Сеитовага тапшырды.

М.Юнусов.