Янъыларда балалар орталык китапханасында балалар китабининъ юмасынынъ ашылувына багысланган «Дослардынъ китап дуныясы» деп аталып, кызыклы шара озгарылды. Мунда конакта районымыздынъ авылларынынъ китапханаларынынъ куллыкшылары, Кадрия атындагы мектебининъ 4-6-ншы класс окувшылары катнастылар. Байрамга деп бек ярасык китаплер выставкасы аьзирленген. Мунда саьбийлерди туьрли аьлемет дуныяга аькеткен эртегилер, коьп затка уьйреткен, кешелерде уйкысын боьлген соравларга явап берген хабарлар болган китаплер тизилген. Шарады балалар китапхана етекшиси Зульфия Биймурзаева ашып, конакларды хошлады. Ол конакта болган окувшыларга китаплердинъ уьйкен пайдасын, балалар уьшин китап энъ де ювык дос эм окытувшы экенин айтты. Оннан сонъ китапхана методисти Зарема Джумалиева «Акыл казнасы» деп аталган адабиат китапхана квестин озгарды. Мунда окувшылар билим яктан оьз куьшлерин сынадылар. Олар уьшин шара уйгынлавшы эм юритуьвши бек кызыклы борышлар аьзирлеген эди. Балалар уьйкен аваслык пан оларды толтырдылар. Солай ок бу куьнги шарага туьрли кызыклы эртегилердинъ баьтирлери де келип, уьзиклер окып, соравлар берип квесттинъ ийгилигин арттырдылар. Бу куьнги шарада енъилген де, енъуьвшилер де айырылмадылар. Эки команда катнасувшылары да бирдей билимлерин коьрсеттилер. Ойын сырагылары бойынша олардынъ аьр бирисине район администрациясыннан савкатлар тапшырылды. Китапхана адабиат квестиннен баска болып, балалар китап юмасында Муса Курманалиевтинъ китаби бойынша «Канатлы юрек» деп аталган эм ногай язувшыларынынъ яратувшылыгы бойынша адабиат саьати озгарылды. Солай ок орыс язувшылармерекешилердинъ эм А.Култаевтинъ «Яс йигит» деген шыгармалары бойынша инсценирование коьрсетилди.

Н.Кожаева.

Суьвретте: шарадан коьринис.