Мунда Дагестан Оькиметининъ вице-премьери Рамазан Джафаров, Дагестан Оькиметининъ председателининъ орынбасары, илми эм билимлендируьв бойынша министри Уммупазиль Омарова, калалар эм районлар администрацияларынынъ етекшилери ортакшылык эттилер. Йыйылганларга Биринши вицепремьер сол мерекединъ уьйкен маьнелигин белгиледи эм уйгынлавлы оьлшемде алдыда оьтеек шараларды озгарув керегин айтты. Солай болып, Дагестанда байрамшылав бойынша аьдеттеги Савлайроссиялык «Георгиевская ленточка», «Бессмертный полк» деген акциялары оьтееклер. «Уллы Енъуьвге багысланады» деген концертлери уйгынланаяклар. Баска болып, «Билимлендируьв ошакларында «Энъ де ийги Согыс Оьрметининъ музейи» деген ярысы да озгарылаяк. Дагестаннынъ аьскерге шакырылувга дейим ясындагы яслар уьшин «Зарница» деген аьскершилик-спорт ойыны, ДР енъил атлетика бойынша чемпионатлары, Савлайроссиялык альпиниадалары, спартакиадалары оьтееклер. Республикада «Россия уьстиндеги турналар» деген регионаллык яслар фестивали, халклар ара «Енъуьв Парады» деген акциясы, республика бойынша «Эс вахтасы» деген эм сондай баска коьплеген патриотлык шаралары озгарылаяклар. Баска болып, йыйын бойынша Уллы Аталык согыс катнасувшыларынынъ эм сакатларынынъ эм оларга тенъ этилген аьдемлердинъ яшав аьллерин ийгилендируьв бойынша амаллар каралдылар. Соьйтип, айырым, Уллы Аталык согысынынъ ветеранларынынъ, тыл куллыкшыларынынъ эм оьлген аьскершилердинъ тул хатынларынынъ яшав аьллерин, оларга керекли социаллык ягыннан демевлик этуьвдинъ канагатлав йорыгын эм аьлин тергев акында айтылды. Анатолий Карибов негизли шаралардынъ планы кепленгени эм эндиги де бир неше уйгынлав соравлардынъ шешилуьви бойынша куллык юритилетаганы акында билдирди. Йыйыннынъ тамамында каралган соравлардынъ толтырылувына яваплы болганларга, болжалы коьрсетилип, тийисли буйрыклар тапшырылдылар.