«Ногайский район» МР администрациясы эм «Ногайский район» МР-нынъ авыл поселениелерине 8-9-ншы майда эстеликлерге гуьл байламлар салмага, «Уллы Енъуьвге багысланады» деген концертлер, шатлыклы митинглер, 22-нши июньде Эстелик эм кайгырув куьнин озгармага керек. 

«Село Терекли-Мектеб» СП МО аькимбасына «Бирев де мутылмаган, бир зат та мутылмаган» деген стендин янъыртпага борыш берилди.
«Ногайский район» МР-нынъ авыл поселениелери эстеликлерге ярастырув куллыклар этпеге керек болдылар.

Ногай район билимлендируьв управлениесине 23-нши апрельде «Победный май» деп аталган ятлав окув район конкурсын, март-апрель айларында тергев-актарув ислерининъ Савлайроссиялык «Меним атайым» конкурсын уйгынламага, мектеблер сайтында Уллы Енъуьвге багысланган макалаларды баспалар уьшин «Уллы Енъуьв» рубрикасын ашпага тапшырылды.

«Ногайская ЦРБ» ДР ГБУ Уллы Аталык согысынынъ катнасувшысынынъ эм оьлген согыс катнасувшыларынынъ тул хатынларынынъ савлыгын тергеп, савлыгын саклавда энъ де керекли болган дарманлар ман канагатламага керек боладылар.

«Ногайский район» МР УСЗН, Согыс эм ис ветеранларынынъ район совети Уллы Аталык согысынынъ катнасувшыларынынъ, тыл куллыкшыларынынъ эм дуныядан кешкен аьскер куллыкшыларынынъ тул хатынларынынъ яшав аьллерин, солай ок РФ эм ДР законодательствосы ман каралган социаллык коьмегининъ этилинуьвининъ барысын эм аьллерин тергеп карамага борышландырылган.

Район орталык китапханасы согыс темага ятлав окув конкурсын, «Их обжигала пламенем война» поэзия саьатин, район мектеблеринде эрклик дерислерин, «Память пылающих лет» тарих викторинасын, книга выставкаларын уйгынламага тийисли.

«Яслык» яслар орталыгына «Эсимизде саклаймыз. Оьктемсиймиз» деген район акциясын, Уллы Енъуьв байрамына рас барып, Э.Аджигельдиевтинъ эстелигине багысланган футбол бойынша чемпионатын, «Язлык кубогы-2019» футбол бойынша район чемпионатын, яслар сырасында «Табан тирес» миллет ойынын, Савлайроссиялык «Оьлимсиз полк» эм «Георгиевская ленточка» акцияларын озгармага, согыс катнасувшылар акында эскеруьв хабарлардынъ радиотрансляциясын этпеге борыш берилди.

Уллы Аталык согысынынъ катнасувшысы ман, тыл куллыкшылары ман йолыгыс уйгынламага борыш Согыс эм ис ветеранлар район советине, Ногай район билимлендируьв боьлигине, «Яслык» яслар орталыгына, Халк яратувшылыгынынъ эм маданият оьрленуьвининъ орталыгына тапшырылган. 
Балалар яратувшылык уьйи 5-8-нши класслар сырасында суьврет ясав район конкурсын озгармага керек болады.