Баймагомед Аминович Ярлыкапов мунда йыйылган полиция куллыкшыларына Дагестан Аькимбасынынъ Язбасынынъ маьнели тезислери акында айтты, солай ок бизим Ногай районында да сосы тармакларда этилген эм этилинеек куллыклар ман оларды таныстырды.

Б.Ярлыкапов Дагестан Аькимбасы оьзининъ Язбасында республикамыздынъ оьрленуьвининъ баьри якларына эс эткенин белгиледи, солай ок билимлендируьв, савлык саклав, авылхозяйстволык, йоллар тармакларындагы соравларды каравда токтады.

«Дагестан Аькимбасы уьстимиздеги 2019-ншы йылда республикамызда 33 янъы мектеб салынып басланаягын, сонынъ уьшин федераллык бюджетиннен 3,9 миллиард акша шыгарганын билдирди. Озган йыл В.Васильевтинъ баславы ман курылган «100 школа» проекти бойынша республикамызда 117 мектеблерде ярастырув куллыклар этилинди. Белгиленген проектте бизим районнынъ эки мектеби катнасты, айтпага: А.Джанибеков атындагы эм Карагас авылындагы К.Кидирниязов атындагы мектеблери. А.Джанибеков атындагы мектебте терезелер авыстырылды, медицина кабинети каралды, муьлк алынды. Карагас авылындагы мектебининъ тоьбеси авыстырылды эм баска куллыклар этилинди. 

Бу йыл биз «150 школа» проектинде катнасар уьшин 3 мектебти белгилемеге суьемиз: Карасув, Червленные Буруны эм Калинин авылындагы мектеблер. Кумлы, Батыр-Мурза, Уьйсалган эм Шуьмлелик авылларындагы мектеблер айлак осал аьлде, оларда ярастырув куллыклар этилинмейди, олардынъ орынына янъы мектеблер салмага тийисли. Янъыларда белгиленген авыллардагы мектеблерге ДР Билимлендируьв министерствосынынъ куллыкшылары барып, олар кайдай аьлде экенин коьрдилер, – деди оьз соьзинде Б.Ярлыкапов сапатлы билимлендируьв акында айта келип.

Н.Кожаева.
Суьвретте: шарадан коьринис.