Быйыл язлыкта элимиз бойынша 1992-2001-нши йылларда тувган яслар Савытлы Куьшлер сырасына куллык этуьвге шакыртылады. Ал деп шакырув кагытлары йогары, орта-специальли эм орта билими болган (школада 11 класс окып кутарганлар тек C, D, E категориялы водительлик ыхтыяр кагытларын алув уьшин окыяк болса) гражданларга тапшырылады. Бу ерде Кизляр автошколасында водительге окыган ясларга уьйкен маьне бериледи. 

Быйылгы язлык шакырувынынъ, оьткен йыл ман тенълестиргенде, бир баскалыгы сол, аьлиги язлыкта Тарумов эм Ногай районлары ара 60 яс гражданлары аьскер сырасына куллык этуьвге йиберилеек. Былтыр куьз айларында 35 яслар тек йиберилген эди, коьресиз, сан эки кабатка ювык оьскен. 

Тарумов эм Ногай районлар ара военкоматынынъ етекшиси Александр Мельников: 
– Призывниклер Россия Федерациясынынъ баьри регионларындагы аьскер боьликлерине де куллык этуьвге йибериледилер. Алдынгы йылларда бу ягыннан кайдай да бир тыйдажлыклар бар эдилер, эндигиси солар баьриси де тайдырылган. Оннан сонъ эндигиси Россия Аьскер сырасына куллык этпеге бараяткан баьри призывниклерге де республика йыйылыс пунктында ок, аьскершилик кийимлери бериледи эм соннан олар куллык этеек ерлерине еткериледилер, – дейди.
Ногай район орталыгындагы шакырув пунктында призывниклер мен куллык юритуьв комиссиясынынъ куллыгы коькек айынынъ 8-нши куьннен алып басланган. Комиссия сырасында солай ок баьри врачлар-специалистлер де призывниклерди тергев-карав исин юритедилер. Комиссияды «Ногайский район» МР администрациясынынъ аькимбасынынъ орынбасары Баймагомед Ярлыкапов етекшилейди.

– Медициналык тергевлерди оьтуьвге повестка алмаган гражданлар соларды оьтуьв уьшин Терекли-Мектебтеги шакыртув пунктына келмеге боладылар, – дейди Тарумов эм Ногай районлары ара военкомы А.Мельников.

Соны ман бирге быйылгы язлыкта Савытлы Куьшлер сырасында контракт бойынша куллык этпеге суьетаган гражданлар да аьскер боьликлерине йибериледилер. Алдынгы йылларда сондай куллыкка тек аьскер сырасында куллык этип кайткан гражданлар алынатаган эдилер. Быйылдан баслап аьли аьскершилик борышын толтырмаган, оьзинде йогары, орта-специальли билими болган яс аьдемлер де контракт бойынша оьзлери сайлаган аьскер боьликлерине куллык этуьвге йибериледилер. 

Аьскерге шакырув ислери мен байланыслы баьри соравлар ман 8-87-261-314-42 яде 8-87-261-314-41 номерлери бойынша телефон ман занъ сокпага боладылар. 

М.Юнусов.
Суьвретте: Ногай районнынъ ясларды аьскерге шакыртув пунктында.