Эртегилердинъ дуныясында

Янъыларда ногай ярыкландырувшысы Абдул-Хамид Джанибеков тувганлы 140 йыл толувына багысланган шара онынъ атын юриткен мектебте ана тилине балалардынъ суьйимин оьстируьв эм таралтув ниетте оьтти. Мунда 3-4-нши класслар окувшылары эртегилердинъ инсценированиесин коьрсеттилер. Шарады ана тилининъ эм адабиатынынъ окытувшылары Джамиля Койлакаева ман Саида Джумаева юриттилер. Саида Мухудиновна А-Х. Джанибековтынъ халкы уьшин эткен уллы иси акында кыскаша хабарлады. Тагы да ол ана тилимиздинъ маьселеси акында да айтпай калмады. 

Бас деп 1-нши класслардынъ балалары ана тилинде йырлар йырладылар, айтпага: «Анама», «Навруз келди», «Буйратлар». Йырлаган балалар сырасында ногай миллет кийимин кийгенлери де бар эдилер. Олар ийги коьрклери мен коьз каравга да, ийги тавыслары ман тынъламага да бек ийги эдилер. Солай ок баладынъ тысавын шешуьв аьдети мен де йыйылган балалар таныстылар. Шара барысында 3-нши «а», «б», «в», «г» класслар окувшылары «Коьгилдий коьжек», «Коян-тигуьвши», «Алал косак», 4-нши «а», «б», «г» класслар окувшылары «Кобызы ман кыз», «Туьлки эм коян», «Алтын топ», «Кызганыш эм колы ашык» эртегилерин коьрсеттилер. Олар ийги аьзирленген эдилер, аьр бир бала шалысып, оьзининъ борышын толтырды, ама «балаларымыз куьн сайын бир – бири мен аьллескенде, ана тилинде соьйлесе, тез-тез сосындай шараларда катнасса, олар тилимизди тийисли кадер билеек эдилер» деген ой да кыйналдырмай калмады.

Конкурс сырагылары бойынша 1-нши орынга – 4-нши «г» класс (окытувшысы С.Джумаева), 2-нши орынга – 3-нши «в» класс (окытувшысы Г.Хозбулатова), 3-нши орынга – 3-нши «а» класс (окытувшысы Ю.Зарманбетова) тийисли болдылар.

Баргылы орынларга тийисли болган класслар окувшыларына Сый грамоталар тапшырылган мезгилде ана тилининъ эм адабиатынынъ окытувшысы Зухра Мавлимбердиева балаларга ана тилин сыйлап, суьйип билмеге керегин айтып, пайдалы маслагатларын берди.

Н.Кожаева. 
Суьвретте: эртеги коьрсетилген мезгилде.