Дагестан Аькимбасы Сергей Меликов Дагестан Республикасынынъ Халк Йыйынына республикадынъ Оькиметининъ Председателининъ ис орынына Абдулмуслим Абдулмуслимовтынъ кандидатурасын ойласып каранъыз деп коьрсеткен.

Дагестан Конституциясы ман келисли кепте, республика парламентининъ депутатлары коьрсетилген кандидатурады бир юма ишинде ойласып карадылар.
22-нши февральде Махачкалада Дагестан Республикасынынъ Халк Йыйынынынъ 8-нши сессиясы болып оьткен.
Бас деп депутатлар янъыларда республика парламентине Дагестан Аькимбасы Сергей Меликовтынъ маслагаты ман Дагестан Оькиметининъ Председателининъ ис орынына коьрсетилинген Абдулмуслим Абдулмуслимовтынъ кандидатурасын ойластылар. Сонынъ сырагысында олар бир тавыстан Абдулмуслим Абдулмуслимовты Дагестан Оькиметининъ Председатели этип беркиткенлер.
Сессиядынъ куьн йосыгы бойынша баьриси 28 закон проектлери эм соравлар ойласылган эм тийисли карарлар кабыл этилинген.