28-нши октябрьде Дагестан Республикасынынъ 7-нши шакырувынынъ Халк Йыйынынынъ 4-нши сессиясында депутатлар Дагестан Республикасынынъ Оькиметининъ Председателининъ ис орынына Абдулпатах Амирхановтынъ кандидатурасын беркитуьв акында соравды ойласканлар.

Сессияда болган 85 депутатлардынъ баьриси де Абдулпатах Амирхановты Дагестан премьер-министри этип беркитуьв уьшин оьз тавысларын бергенлер.
Оннан алдын Дагестан Аькимбасы Сергей Меликов 27-нши октябрьде Абдулпатах Амирхановтынъ кандидатурасын оны ДР Оькиметининъ Председатели этип беркитуьвге ДР Халк Йыйынынынъ макуллыгын алув уьшин маслагат эткен эди.
«Буьгуьнлерде, йыл узагы этилинген куллыклардынъ сырагыларына таянып, Оькимет онынъ етекшилиги астында оьз ис аьрекетин армаган бардырмага тийисли деп санайман», – деген сессиядынъ барысында Дагестан Аькимбасы Сергей Меликов.
Абдулпатах Амирханов оьз ягыннан ога этилинген сеним уьшин республика етекшисине эм парламентине разылыгын билдирген.
Оннан да алдын, 14-нши октябрьде, Сергей Меликов Дагестан Республикасынынъ Оькимети кайтадан уйгынланмага керек болган саялы, аьлиги регион Оькиметине янъы Оькиметтинъ сырасы туьзилгенше оьз ис борышын кесек заманга дейим толтырып турмага тапшырган.