Бир хыйлы заман Дагестанда янъы коронавирус юкпалы маразы ман байланыслы аьллер бир кепте турган эдилер. Болса да ызгы эки юмадан бери республика еринде соны ман авырыйтаганлар саны оьсип барувы белгиленеди.

– Аьли эки юмадан бери COVID-19 авырувдынъ белгилери болган аьдемлердинъ эмлев учреждениелерине туь-суьвлерининъ оьлшеми оьсип барувы эсапка алынган. Мунавдай туьзилип турган колайсыз аьллерде коронавирус маразы ман авырыган аьдемлер уьшин орынлар фонды арттырылган эм 3613 орынга дейим еткерилген деп эсапланады. Медучреждениелерде 1368 бос орынлар бар деп саналады. Буьгуьнлерде республика бойынша 1119 аьдем амбулаториялык йорыгы ман эмленедилер, – деп билдирген ДР савлык саклав министрининъ орынбасары Татьяна Беляева.
Онынъ айтувы ман, министерство коронавирус юкпалы маразы ман авырыганларды эмлев уьшин 10 туьрли дарманлар, солай ок авырувлылар ман аьллесетаганлар уьшин айырым препаратлар да сатып алган. Оннан баскалай, министерство керекли дарманлар сатып алув уьшин контрактлар туьзген эм республика поликлиникаларына солар йиберилип басланган. Коронавирус пан пневмония авырувларын эмлев уьшин алмай калган дарманлар акында ДР савлык саклав минис- терствосынынъ кызувлы линиясына эм Роспотребнадзорга 8 (8722) 78-03-03, 8 (8722) 69-03-05 телефон номерлери мен занъ сокпага болады.
– Аьлиги заманда дарманлар уьлестирилип туры. Дагестан 35 миллион маьнет акшадынъ медициналык препаратларын алган, – деген Татьяна Беляева. – Авырыйтаган аьдемлер керекли дарманларды уьйлеринде алув уьшин врачты уьйине шакырмага тарык болады. Врач COVID-19 маразына тест алады эм керекли эмлев йорыгын язады.
Медиклер яшавшыларга оьз-оьзлеринъизди эмлев мен аьвликпенъиз деп шакырув этеди. Врачлар-клиницистлердинъ айтувлары ман, авырув сонъгы заманларда оьзининъ катылыгын коьрсетип барады.