Тарумов районнынъ А-Невское авылынынъ фельдшер-акушер пункты буьгуьнлерде уьйренген ис йорыгы ман куллык этеди. Авыл еринде аьли уьшин санитар-эпидемиологиялык аьллер колайлы деп саналады. Болса да мундагы медиклер баьри затка да аьзир.
Авыл фельдшер-акушер пункты ман почта боьлиги бир меканда орынласканлар, тек эсиклери баска. Мекан эски, совет заманларыннан калган.
– Келеяткан 2021-нши йылда бизге янъы мекан курмага соьз бергенлер, – деп куьлемсирейдилер мени йылы кепте йолыккан патронаж медсестрасы Мая Юсупова ман акушерка Хадижат Сапарова.
Хадижат мунда 27 йылдан бери ислейди. Ол Кизляр районынынъ Степной авылында тувган, Дербент медициналык училищесин окып кутарган.
Мая А-Невскоединъ оьзинде тувган, Кизляр медициналык училищесин окып битирген сонъ, 1995-нши йылдан алып авыл ФАП-ында куллык этеди.
Фельдшер Тамара Хизриева – ФАП басшысы, ол да Кизлярдагы медколледжди окып кутарган сонъ, тувган А-Невское авылына келип, эки йылдан бери мунда куллык этеди.
Медиклер оьзлерине белгиленген куьнлеринде шеретлеп авылдагы азбарларга кирип, авылдасларынынъ савлыгын билип шыгадылар. Олардынъ ис тапшырмалары аьр бирисиндики оьзиндики болса да, халкка керекли медициналык борышларын бирге толтырадылар.
– Мен акушерка болсам да, туьннинъ бир заманында телефон ман занъ согып, картка, уьйкенге яде балага коьмекке шакырса, «бу ис меники тувыл» демей бараман. Соьйтип, бизим аьр биримиз «мине куллык сеники, мунавы меники» деп айырмай, куьндиз-кеше демей ислеймиз, – дейди Хадижат Сапарова.
Оьз кезуьвим мен олардан янъы коронавирус маразы акында сорайман. Медиклер быйыл апрель-май айларында авыл еринде COVID-19 эм пневмония авырувлары ман байланыста аьллер авырланып кеткени акында хабарлайдылар. Сол заман аьсеринде куьн сайын 15-20 авырувлыларга капельница салып турмага туьскен. Авырыганларды фельдшер-акушер пунктынынъ боьлмесине, процедурныйга, саьнеге яткарып, биревиннен баскасына ювырып эмлев йорыкларды толтырганы акында эскередилер.
– Наьсипке, сол куьнлерди йойымсыз оьткердик. Авыр аьлде авырыганлар болмадылар. Биревлерди Кизлярдагы эм Тарумовкадагы больницаларга йибермеге туьсти. Хыйлы аьдемлерди амбулатория йорыгы ман эмледик. Авылымызда коронавирустан яде пневмониядан оьлген бир аьдем де болмады, – дейди фельдшер Тамара Хизриева. – Аьли, Аллага шуькир, аьллер мадарлы демеге боламыз. Буьгуьнлерде авылымыздан Кизлярда – 2, Тарумовкада 2 аьдем больницаларда эм бизде, авылда, 8 аьдем амбулатория йорыгы ман эмленедилер.
Пунктта биринши медициналык ярдамын этуьв уьшин, COVID-19 бан байланыслы баьри керекли дарманлар да бар. Коронавирус яде пневмония ман авырыганларга, солай ок шаркы авыр хатынларга дарманлар тегин бериледи. Солардынъ ишинде баалы дарманлар да бар. Енъил эм орта кепте авырыганлар Кизлярга поликлиникага барып, врачтан керекли эмлев йорыгын яздырып аькеледилер эм мунда эмленедилер.
Соьйтип, ис аьрекетин бардырадылар бизге конъысы Тарумов районнынъ А-Невское авыл фельдшер-акушер пунктынынъ медициналык куллыкшылары.
М.Юнусов.
Суьвретлерде: Тамара Хизриева; Хадижат Сапарова эм Мая Юсупова.
