Бу юмадынъ дуьйсемби куьнинде «Ногайский район» МР администрациясында болып озган йыйында Ногай орталык больницасынынъ етекшиси Фаризат Межитовадынъ билдируьвине коьре, коронавируслы маразы бойынша аьллер бу куьнлерде ийгилерден тувыл.

Онынъ соьзине коьре, аьллер осал болмаса да, коркыныш тувдырады. Уьстимиздеги йылдынъ коькек айынынъ 12-нши куьнине Ногай орталык больницасынынъ инфекционлы боьлигинде онавдан артык авырувлы аьдем бар эди, солардынъ уьшевинде коронавируслы маразы бары аянланган, тагы да 11 аьдем уьйлеринде эмленуьв аладылар.
– Маразга карсы турув тынышлардан тувыл, бу вирус бизге таныс тувыл, куьннен-куьнге авырланып та барады. Биз аьли авырувды енъдик деп айтып болмаймыз, оьткен йылда биз бу мараздан 20-дан артык аьдемлеримизди йойган болсак, бу йыл сол мараздан сонъ, бас себеби сол мараз болып, 30-дан артык аьдемлеримизди йойдык. Сонынъ уьшин биз мараздынъ алдын шалып, ога карсы вакцинады алмага керекпиз. Бу вакцина боьтен де, ясуьйкенлерге пайдалы. Вакцинацияды учреждениелер етекшилери оьзлериннен басламага кереклер. Олар баьриси де бу куьнлерде вакцина алмаганлар, солай болганда, олар оьзлерининъ кол астында ислейтаганларга – вакцина эттиринъиз деп, айтып та болмаяклар, – деди Фаризат Межитова.
Ногай орталык больницасынынъ етекшиси йыйылганларды айлак кешиктирмей, мараз бизди енъип алганша, оьзимиз сонынъ алдын, вакцина эттирип, шалайык деген шакырув ман тамамлады.
Г.Курганова.