Район еринде янъы коронавируслы инфекциясы ман байланыслы аьллер акында Ногай район орталык больницасынынъ бас врачы Фаризат Межитова билдирди. Онынъ айтувына коьре, район поликлиникасына Спутник V «Гам-Ковид-Вак» 600 вакцина аькелинген. Госуслуги бойынша вакцинация этуьвге шеретке турганлар райполиклиникасына келип, прививка этпеге боладылар, пункт 8 саьаттен 17 саьатке дейим ислейди.

– Аьлиги заманга район еринде 2450 аьдем вакцинация оьткенлер, олардынъ ишиннен 1688 аьдем экинши прививкады алганлар. Район бойынша 10472 гражданлар вакцинация оьтпеге керекли, – деп билдирди больницадынъ бас врачы. Биз вакцинады авылларга да йиберемиз. Бир саьаттинъ ишинде вакцина авыл медпунктына аькелинеди эм вакцинация оьтпеге язылган яшавшыларга этилинеди. Аьли айлак куьшли иссилик кырда, эсли аьдемлерге район орталыгына келмеге кыйынлы, сога коьре оларга вакцинация этуьвге баьри амаллар да туьзилген.
Ногай районымызда коронавируслы инфекция бойынша аьллер осал. Больницада пневмония ман 29 авырыган аьдем эмленеди, олардынъ экевинде коронавирус инфекциясы бар деп аянланган, амбулаторлык эмленуьвде де 8 аьдем бар. 29 аьдемнинъ ишинде уьшеви авыр авырувлылар деп саналады.
– Аьлиги заманда коронавирус мараз бан коьбисинше яслар авырыйдылар. Сога коьре, мен ясларды эм 60 ястан озганларды вакцинация этинъиз деп шакыраман. Бу сизинъ, тувганларынъыздынъ, досларынъыздынъ ден савлыгы уьшин этилинеди, – деген соьзлерин каратты яшавшыларга Фаризат Янибек кызы Межитова.
Бу куьнлерде аьр бир аьдемнинъ ден савлыгы оьз колында болады. Коронавируслы маразга карсы турув, сол яман авырувдынъ алдын тек вакцинация шалмага болады. Сонынъ уьшин кешиктирмей тийисли вакцинады алайык.