Кеше, 4-нши февральде, Москвада уьшинши савлайроссиялык боксерлар форумы ишинде Токио-2020 Олимпия чемпионы, кеспили рингте бир де енъилмеген боксер Альберт Батыргазиев Панама элининъ ваькили, WBA экс-чемпионы Хесреэл Корралес пен йолыгысты. Кеспили спортсменлердинъ бокс бойынша куьресуьв 10 раунд эсабында оьтпеге керек эди, ама ол заманыннан алдын тамамланды. Боксерлар рингте сав дуныялык аты болган Альберт Батыргазиевти кезекли енъуьвге етискени мен Дагестан Республикасынынъ Аькимбасы Сергей Меликов кутлады.
– Бизим боксер Альберт Батыргазиев тагы да энъ ийги! Титуллары бар куьндесининъ сулыбы да, усталыгы да дагестанлыды токтатып болмады! Куьрес коьрнекли эм кызыклы эди: Альберт йигерлик пен сенимли аьрекетледи, аралыкты ыслады, туврадан-тувра урды. Энди онынъ эсабында кеспили боксерлар арасында озган сегиз куьресуьвлер эм баьри де енъуьвлер мен!
Альберт, Дагестан сени мен оьктемсийди! Сен яс, зейинли эм сенде амбициялар бар. Сен оьтип болмастай каялар бир де болмасын сенинъ алдынъда. Кайдай дережели ярысларында да сен йигерлик пен бизим республика эм элимиз атыннан дайым да оьзинъди коьрсетеегинъде шекленмеймен! – деп язды оьзининъ Телеграм-каналында Сергей Меликов.
