Махачкаладагы билимлерди арттырув институтында аьр йыл сайын увыт айында ана тил куьнине багысланып, шаралар озгарыладылар. Бу йыл да мунда авыр аьллер мен байланыслы болып онлайн кебинде ана тилинде Дагестан авторларынынъ асарларын ийги этип окувга багысланган республика бойынша ярысы оьтти.

Ярыста Ногай районынынъ Кадрия атындагы орта мектебининъ 11-нши класс окувшысы Карина Мансурова, А-Х.Ш.Джанибеков атындагы мектебининъ 11-нши класс окувшысы Оьзбек Кадыров эм З.Акмурзаев атындагы Червленные Буруны авыл мектебининъ 11-нши класс окувшысы Халиф Алимуллаев ортакшылык эттилер.
Республика бойынша ярысынынъ тоьрешилер агзалары филология илмилерининъ кандидаты Фания Кусегенова, Дагес- таннынъ Язувшылар союзынынъ правлениесининъ секретари, ногай секция етекшиси Анвар-Бек Култаев ярыста ортакшылык эткенлердинъ окыган асарларын тынъладылар эм оьзлерининъ ойларын айттылар.
Ярыс тамамлары бойынша А-Х.Джанибеков атындагы мектебининъ 11-нши класс окувшысы Оьзбек Кадыров Мурат Авезовтынъ «Кабадагы бала» деген балладасын окып, 39 балл казанды эм соны ман ол 1-нши орынга тийисли этилди.
Соьйтип, яска ДР Билимлендируьв эм илми министерствосынынъ Сый грамотасы тийисли этилинди.
З.Шугаипова