Янъыларда Нефтекум районынынъ Каясула авылында 2021-нши йылдынъ навруз айынынъ 19-ншы куьнинде Халклар ара ана тилининъ куьнине багысланган йогары класс окувшыларынынъ катнасувы ман «Билимли бол» деген ойыны уйгынланып оьтти. Ставрополь крайынынъ регионаллык ногай миллет-маданият автономиясы эм Нефтекум кала округы бойынша администрациясындагы Билимлендируьв боьлигининъ демевлиги мен Каясула авыл орта мектебининъ окытувшылары эм окувшылары ойын уйгынлавшылары болдылар. Sandyk.biz. деген биринши ногай Интернет-туькени шарадынъ официаллык партнёры болды.
Шара Россия Федерациядынъ гимныннан басланды. Амалламады Нефтекум кала округы бойынша Россия МВД Ямагат советининъ агзасы, педагог А.Джантемирова юритти. Ойынга йыйылган конакларга хошлав соьзи мен Каясула авыл орта мектебининъ етекшиси Р.Аллимулаев, Ставрополь крайынынъ регионаллык ногай миллет-маданият автономиядынъ Исполком председателининъ атыннан З.Шандиева, Б.Елманбетов, Нефтекум кала округындагы администрациядагы Билимлендируьв боьлигининъ алдышы специалисти Д.Магомедова эм Дагестан Республикасындагы Ногай районыннан келген сыйлы конаклар, айтпага, ДР «Ногайский район» МР Депутатлар Йыйынынынъ депутаты А.Акбердиев шыгып соьйледилер. Келген конакларга эм ойын катнасувшыларына багыслап, Каясула авыл орта мектебининъ ис коллективи эм окувшылары ногай миллет азбарын аьзирледилер, айтпага, сонынъ ишинде ногай миллет кийимлерин, асханасын, уьйшиликте кулланган алатлары салынган выставкасын да уйгынлаган эдилер. Оьзининъ яратувшылык оьнери мен йыйылганларды Каясуладынъ «Шатлык» деген халк биюв коллективи де таныстырды. Кызыклы ойыны Сарайшык деген Ногай Ордасынынъ бас каласы акында видеоролиги мен басланды.
Ойында ети командалары ортакшылык эттилер. Иргаклы авылыннан «Намыс», Каясула авылыннан «Акыллылар», Кара-Тоьбеден «Яс карлыгашлар», Махмуд-Мектебтен «Юлдызлар», Абрам-Тоьбе авылыннан «Тил бирлик», Новкус-Артезиан авылыннан «Дослык», Тукуй-Мектебтен «Куваныш» деген командалары уьйкен аваслык пан ортакшылык эттилер. Ойын уьш кезекте оьтти. Ойын катнасувшылары Уллы Аталык согысы, аьлиги заманнынъ, ногай халкынынъ тарихи, дини, аьдетлери, уьйшилик яшавы, авызлама халк яратувшылыгы, ана тили, миллет асханасы деген соравлары бойынша билимлери мен сынастылар. «Узорные войлоки ногайцев» деген китабининъ авторы М.Манкаев, Нефтекум кала округындагы администрациясы бойынша Билимлендируьв боьлигиннен Д.Магомедов, Ставрополь крайындагы регионаллык миллет- маданият автономиядынъ ваькили Б.Елманбетов, «Ногайский район» МР Депутатлар Йыйынынынъ депутаты А. Акбердиев тоьрешилер сырасына кирген эдилер.
«Билимли бол» деген ойыннынъ негизли уьш кезеги эм косымша кезегининъ тамамлары бойынша биринши орынды Махмуд-Мектеб авыл орта мектебининъ «Юлдызлар» деген командасы, экинши орынды Тукуй-Мектеб авыл орта мектебиннен «Куваныш» командасы бийледи. Новкус-Артезиан авылыннан келген командасы 3-нши орынга тийисли этилди. Ярыс енъуьвшилерди шатлыклы савгалавы ман тамамланды. Шарадынъ бир катнасувшысына да эс берилмей калмады. Енъуьвшилерге, катнасувшыларга эм ойыннынъ конак- ларына Сый грамоталары, дипломлары, кубоклары эм медальлери тапшырылдылар.
Интеллектуаллык ойыннынъ озгарувы бойынша ойыннынъ авторы Москва каласындагы «Ногай ямагаты» деген ямагат организациясынынъ атыннан катнаскан аьр бир командага профессор В.В.Трепавловтынъ «История Ногайской Орды» деген китаби тапшырылды. Нефтекум кала округында эм Ставрополь крайындагы Степное муниципаллык образованиесининъ туьрли мектеблерининъ коьплеген окувшылары ногай тили эм адабиатынынъ саклавынынъ кенъесинде, «Билимли бол» деген интеллектуаллык-уьйренуьв ойынында белсенли катнасып келгенлери аьр кайсымызды да бек суьйиндиреди.
Ставрополь крайынынъ ногай миллет-маданият автономиясынынъ исполкомын «Билимли бол» деген ойынын етимисли озгарувы ман ак юректен кутлаймыз. Ногай халкымыздынъ тилин эм маданиятын саклавга каратылган проектлерининъ сырасыннан болган бу оьзгерис, тек биринши кере озгарылып калмай, келеекте де ол яшавга шыгарылып бараягына сеним этемиз.
Суьвретте: шарадан коьринис.
