Республикамыздынъ Ногай районында туьрли миллет ваькиллери аьел курып, балалы-шагалы, наьсипли, онъайлы болып, сый-абырай казанып, татымлыкта яшав суьрип келедилер. Сондай аьеллердинъ саны да аз тувыл, олардынъ бириси болады, ногай яс Азиз эм даргин миллетли хатын Фатима курган Муллаевлердинъ аьели. Яс аьел курылганлы мине казан айынынъ 17-нши куьнинде 5 йыл болады.

Яслар экеви де Дагестаннынъ гуманитарлык институтында, айтпага, Азиз лингвистика, Фатима журналистика боьликлеринде йогары билимин алганлар. Сол йогары окув отаны эки ястынъ бири-бириси мен танысып, бактылары ашылувына себеп болды. Буьгуьнлерде Азиз Ногай районы бойынша Дагестан Муфтиятындагы ярыкландырув боьлигининъ етекшисининъ орынбасары болып аьрекет этеди. Ол англис эм араб тиллерин йогары оьлшемде биледи. Ислам динин яйылдырув бойынша аьрекет этип келеди.
Эки ястынъ арасында энген суьйимге бир зат та буршавлык этип болмады. Фатима алыс Сергокалинский районынынъ Махарги авылыннан болады. Кыскаяклы куллыксуьерлиги мен, танълыгы ман, кайсы эткен исин де сахый эм ийги этуьви мен эрининъ тувган кардашлары, авылдаслары арасында сый эм абырай казанып келеди.
Ол уьйине келген кайсы конакты да берекетли сыпырасы ман, ийги соьзи мен, йылы шырайы ман хош алады. Фатимадынъ колы – алтын. Ол ногай катламасын, даргин чудуды, боьрегин, авар ынъкалын, туьрли таьтли зияпетлерин усташа писирип, баьри ногай аьдетлерин де тийислише тутпага шалысады. Боьтен де кызыклысы, ол бес йыл ишинде ногай тилин уьйренип, сол тилде баьриси мен де соьйлемеге шалысады. Бу аьелде эки аьвлетлери доьрт ясындагы Ахмад эм яс ярым болган София да оьсип, ата- анасынынъ, атайы Махачтынъ эм тетеси Эльмирадынъ куьезин арттырып келедилер. Атайы ман тетейи уныкларына савлай юрек юмартлыгын савкатлап келедилер. Олар да кишкейден сувдыратып ногай тилинде соьйлейдилер. Ногай тилинде ятлавлар, эртегилер окымыслы айтып келедилер.
Бу яс аьелге келеекте де коьп етимисти, онъ берекетти, оьсип, оьрленип келгенин йораймыз.
Г.Нурдинова.