Оьткен йылдынъ ызгы айы уллы ногай шаири Гамзат Аджигельдиевтинъ эстелигине, онынъ тувган куьнине багысланып озды. Аьр бир билимлендируьв учреждениесинде талаплы шаирге багысланган шаралар озгарылдылар.
Яшав оьмири Гамзаттынъ бек эрте уьзилген, ол 27 ясына да толмай бу яшавдан кешип кеткен, болса да, ол сол кыска заман ишинде бек коьп асарлар язып калдырмага уьлгирген. Не шаклы онынъ аьли де баспадан шыкпаган ятлавлары, хабарлары бар.
Гамзат Юсуп увылы Аджигельдиев XX оьмирдеги ногай адабиатына оьзининъ бек уллы косымын эткен.
Талаплы шаирдинъ мерекесине багысланып баьри мектеблерде де 2-11-нши класслардынъ окувшылары ман «Сеси онынъ оьмирлерге занъырар» деген тема бойынша класс саьати, «Мен язаман халкым йырлап юрсин деп», «Аьр ятлавда юрегининъ йылувы», «Гамзат – халк- тынъ алал увылы» деген темалар бойынша там газетасын аьзирлев шарасы, «Шоьл ийисиннен тувганман» деп район бойынша ятлав шарасы (мунда 8-11-нши класс окувшылары катнастылар), 10-11-нши класс окувшылары араларында сочинение шарасы озгарылдылар.
Солай ок, аьр бир мектебте шаирге багысланган кешлик, аьр бирисининъ темасы туьрли, озгарылды.
Окытувшылар арасында да район кезегинде йыр конкурсы болды.
Бу шарадынъ барысында Гамзат Аджигельдиевтинъ ятлавларына салынган кайдай туьрли анъларды да эситтик. Аьр бир мунда катнаскан аьдемнинъ коьнъили коькте эди.
Кайсы шарада болса да, Гамзат Юсуп увылы Аджигельдиевтинъ аьлемет тил мен, терен философиялык ой ман язылган ятлавларын окувшылар окып эситтирдилер.
Ногай район Орталык китапханасынынъ куллыкшылары да талаплы шаирге багысланган шараларын озгардылар. «Оьмирлерге соьнмес тавыс» деп аталган видеоролик те коьрсетилди. Бу шаирдинъ савлай яратувшылык йолына багысланган эди. Сол шара ишинде йыйылганлар оьз ойлары ман боьлистилер, «ЦРБ» МКУ етекшиси Сабират Абубекерова балаларга шаирдинъ акында ийги этип хабарлады.
Гамзат Аджигельдиевке багысланган айлык ишинде озгарылган шаралар ишиннен, сол шараларда катнаскан аьдемлердинъ коьбисининъ эслеринде Орта-Тоьбе авылынынъ орта мектебинде озгарылган, автордынъ «Наьсипли» хикаеси бойынша тоьгерек стол калды.
Гамзат Юсуп увылы Аджигельдиев коьплердинъ эслеринде бек талаплы шаир болып калады, оьлимсиз онынъ яратувшылыгы, бек уьйкен халкымызга калган асабалыгы.
Г. Сагиндикова.
Суьвретте: Орта-Тоьбе авылында болган тоьгерек стол.
