А-Х.Джанибеков атындагы орта мектебинде

Балалар ман йолларда болатаган баьлелердинъ алдын шалар ниетте, туьрли куллыклар юритиледилер. Сол алдын шалув ислердинъ бириси окувшыларды йол-юрисининъ яс инспекторларынынъ (ЮИД) отрядларынынъ сыраларына киргистуьв болады. Белгиленген отрядлар болса, орта мектеблердинъ негизинде туьзилгенлер. ЮИД барысынынъ 48 йыллыгына рас барып, янъыларда А-Х.Джанибеков атындагы мектебинде «Кавыфсыз тегершик-2021» республикалык конкурсынынъ мектебтеги кезеги оьтти.

Шарады А-Х.Джанибеков атындагы мектебининъ етекшисининъ тербиялав иси бойынша орынбасары Эльмира Суюндикова ашты. Ол балаларга йол-юрисининъ яс инспекторларынынъ эткен аьрекетининъ пайдасы акында айтты. Шарада 4-6-ншы классларынынъ окувшылары ортакшылык эттилер. Конкурс катнасувшылары базласлардынъ доьрт кезегиннен оьттилер, айтпага: «Яратувшылык станциясы», «Йол-юрис йорыкларын ийги билгенлер», «Врач келгенше ярдам этуьвдинъ негизлерин билуьв», «Тетикти айдав». Балаларга жюри эсабында С.Батыров атындагы саниятлар мектебининъ окытувшысы М.Курганова, ДПС инспекторы Э.Картакаев белги бердилер. Окувшы кызлар мектебтинъ медсестрасы Авас Кочеровага врач келгенше биринши коьмекти кайтип этуьв кереги акында хабарладылар. Оннан сонъ окытувшы А.Койбаков балалардынъ тетик айдап болувын тергеди. Ярыслар бек кызыклы эм яны авырув аьлде оьттилер. Аьр бир окувшы оьзининъ тенълерининъ ога эткен сенимин акламага эм оьз командасын енъуьвге ювыклатпага шалысты. Конкурс сырагылары бойынша 1-нши орынга 5 «б» классынынъ (окытувшысы К.Оразбаева), 2-нши орынга 4 «г» классынынъ (окытувшысы Ю.Махмудова), 3-нши орынга 6 «б» классынынъ (окытувшысы Л.Сагиндикова) командалары тийисли болдылар.