«Ногайский район» МР администрациясы район яшавшыларына аьлиги болып турган аьллерге анъламлык пан, шыдамлык пан караганлары уьшин разылык билдиреди. Сиз уьйинъизде калатаганынъыз уьшин савболынъыз! Биз биргелесип енъермиз маразды!

2020-ншы йылдынъ коькек айынынъ 20-ншы куьниннен алып йогары аьзирлик режимининъ тергеви куьшленген. Авыллар арасында автокоьликлердинъ юриси токтатылган. ОМВД куллыкшылары ман район кырына баратаган автокоьликлер кайтарылады, юрмеге ыхтыяр тек специальли техникада, ГСМ, азык-туьлик тасыйтаган коьликлерде, авылхозяйстволык тармагында ислейтаганларда бар.

Авыл-хозяйстволык куллыкшылары кыр куллыкларын этпеге боладылар, солай ок ветуправление куллыкшыларынынъ да алдын шалув ислерин этпеге ыхтыярлары бар.

Ногай район РОВД куллыкшылары орамда автокоьлик пен юрип, халкты уьйде олтырынъыз деп шакырады. Олар Роспотребнадзор куллыкшылары ман биргелесте аьрекетлейтаган аптекаларды, туькенлерди тергейдилер, анълатув хабарласувлар юритедилер.

Баска регионлардан келгенлерге 14 куьн узагында уьйден шыкпанъыз деп тилек этемиз. 2020-ншы йылдынъ коькек айынынъ 21-нши куьниннен алып айырым токтаска дейим баьри учреждениелеринде эм организацияларында гражданларды кабыл этуьв токтатылган.

ЦЗН, ОПФ, УСЗН организацияларына аьризелер бермеге суьетаганлар «Госуслуги» порталында регистрацияланмага боладылар. Осал аьллерде калган аьеллер кызувлы линиядынъ телефон номерине тел сокпага боладылар: 8-928-576-99-32; 8-928-557-76-80.

Сыйлы гражданлар! Уьйлеринъизде болынъыз! Оьзинъизди эм ювыкларынъызды сакланъыз!

М.Аджеков,
«Ногайский район» МР администрациясынынъ аькимбасы.