Аьлиги заманда калалар араларында, коьбисинше, аьдемлер автобуслар ман юредилер, неге десе олар тийисли ерге тез эм колай еткередилер. Ама сол автобуслардынъ иелери тийислисинше оьзлерининъ аьрекетлерин этпейдилер, налоглар тоьлемейдилер яде сол аьдем тасув аьрекетин лицензиялар аркалы оьткермейдилер. Олардынъ аьрекетиннен патшалыкка бир келим де келмейди.
Калалар ара аьдемлерди тасыйтаган предпринимательлердинъ аьрекетин законга келисли кепте уйгынлав уьшин, Дагестан Республикасы бойынша МВД-сы ман алынган карар бойынша уьстимиздеги йылдынъ казан айдынъ 18-нши куьниннен алып 27-нши куьнине дейим «Автобус» профилактикалык операциясы озгарылды.
Автобус автокоьлигин айдайтаганлар эм районлар, калалар ара автобуслардынъ иелерининъ эслерине саламыз: РФ КоАП 12.31.1 статьясына коьре, эгер сол коьликти айдавшылар тийисли йорыкларды тутпайтаган болса, кеспили эм квалификациялык талаплавлар бузылатаган болса, должностной лицолар – 20000 мынъ маьнет акша, юридический лицолар 100000 мынъ маьнет акша штраф тоьлемеге керек боладылар. Солай ок автобусты айдаяктан алдын тутылмага керек борышлар да бар: сол борышлар автобустынъ иеси мен яде айдавшысы ман тутылмаса, физический лицолар – 3000, должностной лицолар – 5000, юридический лицолар 30000 маьнет акшалай штраф тоьлемеге кереклер.
Аьдемлер тасыйтаган автобуслардынъ айдавшылары олардынъ коьлигине мингенлерге анълатув ислерди этпеге кереклер, эгер этпеселер должностной лицолар – 10000 маьнет акша, юридический лицолар 30000 маьнет акшалай штраф тоьлейдилер. Аьдемлерди эм олардынъ юклерин тийисли йорык тутылмай аькетселер де, автобуслардынъ айдавшыларына – 1500 маьнет, должностной лицоларга – 10000 маьнет эм юридический лицоларга – 25000 маьнет акшалай штраф салынады. Россия Федерациясынынъ КоАп 12.23 статьясынынъ 1-нши кесегине коьре де аьдемлер тасыйтаган автобусларда аьдем яшавына кавыфлык тувдырылатаган ыхтыяр бузувлар болсалар, 500 маьнет акша штраф салынады, сол ок статьядынъ 3-нши кесегине коьре балаларды тасувда йорыклар бузылса, 3000 маьнет административли штраф тоьлейдилер. РФ КоАП 11.23 стаьясына коьре аьдемлер тасыйтаган автобуслардынъ тахографы болмаса, штраф салынады. Физический лицоларга – 1000-3000 маьнетке дейим штраф салынады.
Газета окувшыларынынъ баьрисине де уьйкен тилегимизди саламыз: эгер сиз йол-юрис, ортак, аьдемлерди тасувшы автокоьликлерде йорыклардынъ бузылувларына шайыт болатаган болсанъыз, шеттен карап турманъыз, тийисли органларга билдиринъиз.
А.Шангереев, Ногай районы бойынша Россия ОМВД-сынынъ ОГИБДД начальниги.
